Баҳрайн, Кувайт ва Қатар ҳаво ҳудудларини қайта очди

Эроннинг Қатардаги АҚШ ҳарбий базасига берган зарбасидан сўнг хавфсизлик нуқтаи назаридан вақтинча ёпилган Баҳрайн ва Кувайт ҳаво ҳудудлари фуқаро авиацияси учун қайта очилди. Бу ҳақда ҳар икки мамлакатнинг авиация маъмуриятлари маълум қилди. Маълумотларга кўра, ушбу чекловлар хавфсизлик эҳтиёжи туфайли жорий қилинган ва вазият барқарорлашгач, парвозлар қайта тикланган. Қатар ҳам ўз ҳаво ҳудудидаги чекловларни бекор қилиб, фуқаро авиацияси парвозлари қайта йўлга қўйилганини эълон қилди. Мамлакатнинг авиация назорати идорасига кўра, барча чора-тадбирлар мувофиқлаштирилган ҳолда амалга оширилган. Шу билан бирга, Дубайдаги аэропортлар ҳам қисқа танаффусдан сўнг тўлиқ иш фаолиятини бошлади. Амирлик ҳукумати маълумотига кўра, парвозлар белгиланган жадвал асосида амалга оширилмоқда. Бироқ айрим рейслар кечикиши ёки бекор қилиниши мумкин. Мамлакатлар томонидан ҳаво алоқаларининг тикланиши минтақадаги вазият босқичма-босқич барқарорлашиб бораётганини кўрсатади. Айни пайтда авиация хизматлари хавфсизлигини таъминлаш учун тегишли органлар билан ҳамкорликда ҳаракат қилинмоқда.