Ўзбекистон Республикаси товар-хомашё биржасида 2025 йил 20 июнь куни бўлиб ўтган савдоларда асосий бир қатор маҳсулотлар нархида кескин ўзгаришлар қайд этилди. Жумладан, суюлтирилган пропан нархи 724,8 минг сўмни ташкил қилиб, 13,1 фоизга ошди. Ушбу маҳсулот ой бошидан буён 22,6 фоизга қимматлаган.
Бироқ бошқа бир қатор муҳим товарлар нархида пасайиш кузатилди. Энг катта тушиш кўрсаткичи пахта ёғига тегишли бўлиб, у 15,4 фоизга арзонлашди ва 14 млн сўмни ташкил қилди. Шунингдек, пахта толаси нархи 10,6 фоизга, шрот 11,7 фоизга камайди.
Ёқилғи бозорида ҳам пастлаш қайд этилди. АИ-80 ва АИ-92 бензинлари нархи мос равишда 0,1 ва 0,2 фоизга тушган бўлса, дизел ёқилғиси 4,5 фоизга арзонлашди.
Бундан ташқари, цемент ва полиэтилен маҳсулотларининг ҳам нархида енгил пасайиш қайд этилган. Буларнинг барчаси бозордаги талаб ва таклиф, шунингдек, ташқи омилларга боғлиқ равишда шаклланмоқда.
Мутассаддилар савдо динамикасини кузатишда давом этмоқда, айниқса, ёқилғи ва озиқ-овқат маҳсулотларига бўлган талаб мавсумий таъсирларга сезгир бўлиб қолмоқда.