Олий Мажлис Қонунчилик палатасининг навбатдаги мажлисида кўриб чиқилган мазкур лойиҳа орқали Ўзбекистон Республикасининг Жиноят кодекси ва Маъмурий жавобгарлик тўғрисидаги кодексига бир қатор ўзгартиш ва қўшимчалар киритилмоқда. Хусусан, қимматбаҳо металлар ва тошларни ноқонуний равишда олиш ёки реализация қилиш ҳолатларига нисбатан аниқ жавобгарлик белгиланмоқда.
Шу билан бирга, қонун ҳужжатларидаги «валюта қимматликлари», «қимматбаҳо металлар» ва «қимматбаҳо тошлар» каби тушунчаларнинг ҳуқуқий таърифлари ўзаро мувофиқлаштирилмоқда. Бу эса, соҳада ягона ҳуқуқий амалиётни шакллантиришни кўзлайди.
Эътиборга молик жиҳатлардан бири — валюта тушумининг бир қисмини мажбурий сотишдан бўйин товлаш билан боғлиқ маъмурий жавобгарликни бекор қилиш таклиф этилмоқда. Бу орқали тадбиркорлар учун валюта операцияларида енгиллик ва эркинлик муҳитини яратиш мақсад қилинган.
Қонун лойиҳаси қонун ҳужжатларининг бир хилда қўлланишини таъминлаш, ҳуқуқбузарликларнинг олдини олиш, бозор иқтисодиётида шаффофлик ва рақобатбардош муҳит яратишни мақсад қилади. Шу билан бирга, давлатнинг қимматбаҳо ресурслар билан боғлиқ сиёсатини аниқ қонуний асослар орқали мустаҳкамлашга хизмат қилади.
Муҳокамалар натижасида депутатлар томонидан лойиҳа концептуал жиҳатдан маъқулланди ва биринчи ўқишда қабул қилинди.