2024 йил бошида 100 доллардан пастга тушган уран (U308) нархи 2025 йилда қайтадан ўсишни бошлади. Иккинчи ойдирки, нарх ошиб бормоқда — апрел охиридан май охиригача бир фунт учун 67,7 доллардан 71,6 долларгача кўтарилган нарх, июннинг иккинчи ўн кунлигида 75 долларга етди.
Нархлар ўсишига АҚШда атом энергетикаси соҳасини эркинлаштиришга қаратилган янги сиёсат туртки бўлди. Доналд Трамп маъмуриятининг баёнотига кўра, атом станцияларини ишлаш муддатини узайтириш бўйича аризалар кўриб чиқилиши учун энди бир йилдан кўп вақт кетмаслиги лозим. Янги энергоблоклар қурилиши учун эса рухсат олиш жараёни 18 ойдан ошмаслиги белгиланмоқда.
Бу ўзгаришлар АҚШ атом энергетикасини фаол равишда кенгайтиришга қаратилган. Ҳукумат режасига кўра, 2050 йилгача мамлакатда АЭС қуввати 100 ГВтдан 400 ГВтгача оширилиши керак.