Ўзбекистоннинг биринчи мудофаа вазири, генерал-полковник Рустам Аҳмедов Alter Ego лойиҳасига берган интервьюсида 1990-йилларда валюта конвертацияси қандай ёпилганини эслаб ўтди. Унинг таъкидлашича, Ислом Каримов бозор иқтисодиётидан чекиниб, иқтисодиётни куч билан бошқаришга ҳаракат қилган.
Аҳмедовнинг сўзларига кўра, Каримов иқтисодиётни тўлиқ назоратда ушлашни мақсад қилган, бироқ иқтисодиётни куч билан бошқариш амалда имконияти йўқ. «Агар бозор муносабатлари бўлса, унга эркинлик бериш керак. Лекин Каримов қўйиб юбормади. Шунинг учун ҳам конвертацияни ёпишга мажбур бўлди», — деди у.
Собиқ вазирнинг айтишича, Каримовнинг бундай қарорининг ортида валюта танқислиги ва коррупция элементлари турган. Аҳмедов бир бор Каримов банкирларни қаттиқ сиқувга олиш учун куч тузилмаларини йиғганини эслади. Йиғилишда ички ишлар, Мудофаа вазирлиги, прокуратура, МХХ раҳбарлари, шунингдек, молия вазири, Миллий банк ва Марказий банк раҳбарлари иштирок этган.
Рустам Аҳмедов айтишича, банклар ҳар куни валютани айирбошлаш шохобчалари орқали халққа тарқатиш учун чиқарган, аммо амалда бу маблағлар фақат расмийларнинг яқинлари қўлига тушган. «Улар валюта ресурсларини халққа эмас, ўз одамларига берган», — деди у.
Унинг таъкидлашича, Ислом Каримов ўша учрашувда Миллий банк раиси Рустам Азимов ва Марказий банк раҳбарини танқид қилиб, уларни «Сен ўйлаяпсанми, мен кўрмайман? Валютани кимларга бераяпсан? Худди кўрмагандай мендан яширяпсан?» дея қаттиқ гапиргаган.
Аҳмедовнинг фикрича, бу ҳолатлар халқ орасида норозилик келтириб чиқарган ва валюта танқислиги мамлакатда жиддий ижтимоий муаммоларга сабаб бўлган.
Маълумот учун, Рустам Аҳмедов 1991-1997 йилларда Ўзбекистон мудофаа вазири, кейинчалик фавқулодда вазиятлар вазири лавозимларида ишлаган.