25 июн куни Ҳаагада ўтган НАТО саммити доирасида Германия канцлери Фридрих Мерц АҚШ президенти Доналд Трамп билан учрашиб, Россияга қарши янги иқтисодий санкциялар масаласини муҳокама қилди. Унинг сўзларига кўра, Украинадаги можаро ҳарбий ечимга эга эмас ва шу боис Москвага нисбатан иқтисодий босим кучайтирилиши шарт.
Мерц таъкидлашича, Европа Иттифоқи 26 июн куни Россияга қарши санкцияларнинг 18-пакетини қабул қилади, аммо бу етарли эмас. У АҚШнинг иштироки ҳал қилувчи аҳамиятга эга эканини қайд этди, чунки фақат Вашингтонгина Хитой ва Ҳиндистон каби Россия нефт ва газини харид қилаётган давлатларга санкция жорий этиши мумкин.
Германия канцлери Трамп бу масалани жиддий кўриб чиқаяпти деган таассурот қолдирганини айтди. Шунингдек, Эрондаги вазиятни ҳисобга олган ҳолда, АҚШ бу имкониятдан сиёсий ва иқтисодий жиҳатдан фойдаланиши мумкинлигини таъкидлади.
Фридрих Мерц саммитда НАТО Украинага етарли ёрдам кўрсатмаяпти, деган фикрларни рад этди. Унга кўра, Украинага аъзо бўлиш масаласи кун тартибида бўлмаган, аммо ёрдам ваъдалари жиддий ва аҳамиятли бўлган.
Мерц саммитда Россияни НАТОга қарши тажовуздан огоҳлантирган. Унинг таъкидлашича, Россия НАТОни доимий синовдан ўтказмоқда ва альянснинг жавоб бера олиши шубҳасиз бўлиши керак.