Украина президенти Володимир Зеленский Доналд Трамп билан бўлиб ўтган мулоқот ҳақида баёнот берди. Унга кўра, АҚШ президенти билан ҳаво ҳужумидан ҳимоя тизимларини кучайтириш ва дронлар ишлаб чиқариш соҳасида ҳамкорлик юзасидан икки муҳим келишув муҳокама қилинган.
Зеленский, хусусан, АҚШнинг Яқин Шарқдаги операциясини муваффақиятли деб баҳолар экан, бу фаолият Эроннинг ядровий дастури ва дронлар ишлаб чиқариш салоҳиятига зарба бўлганини таъкидлади. У Украина ҳам бу йўналишда АҚШ билан ҳамкорликка тайёр эканини билдирди.
Учрашувда Украина АҚШдан ҲҲҲ тизимларини сотиб олишга тайёр экани айтилди. Зеленскийга кўра, бу фақат АҚШ мудофаа саноатига кўмак бўлиб қолмай, балки Европа ҳам бу жараёнда молиявий ёрдамчи сифатида иштирок этиши мумкин. Шунингдек, дронлар ишлаб чиқаришда икки мамлакат ўртасида қўшма корхоналар ташкил этиш масаласи ҳам муҳокама қилинди.
40 дақиқа давом этган суҳбат чоғида Зеленский Трампга Украина ва Россия техник гуруҳлари ўртасида Истанбулда ўтказилган музокаралар ва асирлар алмашинуви ҳақида ҳам маълумот берди. Жумладан, Россия Украинага ўз қурбонларининг жасадларини қайтаргани ва Киевда уларни таниб олиш жараёни кетмоқда.
Украина раҳбари сўнгги жанглар ҳақида ҳам ахборот бериб, Путин фронтда муваффақият қозонмаётганини таъкидлади. У Трампга воқеликдаги вазият ҳақида «аниқ фактлар» тақдим этганини ва ундан кўрсатилган қўллаб-қувватлов учун миннатдорчилик билдирганини маълум қилди.
«Мен фақат унинг аҳволидан хабардор бўлмоқчи эдим. Қийин даврларни бошдан кечирдик, аммо у жуда самимий эди. У бундан-да самимийроқ бўлиши мумкин эмасди. Уни кўрганимдан хурсанд бўлдим. Бу ажойиб учрашув бўлди. Менимча, ҳозир урушни тўхтатиш учун энг қулай пайт. Эҳтимол, урушни тўхтатиш мақсадида президент Путин билан суҳбатлашишим мумкин», — деди АҚШ президенти Доналд Трамп Зеленский билан учрашув ҳақида.
Маълумот учун: Зеленский ва Трампнинг Вашингтондаги аввалги учрашувида баҳсли ҳолат юзага келган эди. Ўшанда Украина раҳбарининг АҚШ президенти билан учрашувга расмий кийим — костюмсиз боргани Трамп ва унинг вице-президентига хуш келмаган. Бу сафар аввалгисидан фарқли равишда, Зеленский саммитда костюмда кўриниш берди. Фақат у оқ кўйлак ўрнига қора кўйлак кийган.
Дарқове, Трамп Украинадаги уруш ҳақидаги олдинги баёноти — «урушни 24 соатда тўхтатаман» деган гапларига ҳам изоҳ берган. Унинг таъкидлашича, бу сўзлар шунчаки «киноя» бўлган.