2025 йил 25 июнь куниги биржа савдоларида «Nvidia» акциялари 4,33 фоизга ошиб, $154,31 даражага етди. Шу билан компания капитализацияси 3,76 трлн долларга чиқди. Бу кўрсаткич билан у Microsoft’ни (3,66 трлн доллар) ортда қолдирди.
Компания раҳбари Женсенг Хуанг акциядорларга сунъий интеллект инфратузилмаларига талаб юқори бўлиб қолишини таъкидлади. Шунингдек, у «Nvidia»нинг робототехника соҳаси орқали ҳам триллионлаб долларлик даромад келтириш имкониятига эга эканини билдирган.
«Nvidia» сўнгги йилларда сунъий интеллект технологиялари учун график процессорлар ишлаб чиқаришда етакчи ўринни эгаллаб келмоқда. OpenAI, Google ва Amazon каби технологик гигантлар компания маҳсулотларига тобора кўпроқ эҳтиёж билдирмоқда. Бу эса акциялар қийматининг кескин ўсишига олиб келди.
Таҳлилчилар фикрича, «Nvidia» позицияси мустаҳкам, аммо сунъий интеллект бозоридаги рақобат ҳам кучайиб бораётганини инкор этиб бўлмайди.