Эрон расмийлари АҚШ ҳамда Исроил билан бўлиб ўтган қуролли тўқнашув оқибатларини «жиддий» деб баҳоламоқда. Урушдан кўрилган зарар Эрон ҳукумати кун тартибида асосий ўринни эгаллади.
Эрон ташқи ишлар вазири Аббос Ароқчининг таъкидлашича, 12 кунлик уруш давомида кўрилган моддий ва стратегик зарар ҳозирда Эрон Атом энергияси ташкилоти мутахассислари томонидан баҳоланмоқда. Унинг айтишича, мамлакат зарарни қоплаш масаласини устувор вазифалар қаторида кўриб чиқмоқда.
Ароқчи шунингдек, Эроннинг АҚШ билан ядровий музокараларни қайта бошлаши мумкинлиги ҳақидаги гап-сўзларни инкор этди. Унга кўра, бу йўналишда ҳеч қандай келишув ёки режа мавжуд эмас.
Шу билан бирга, вазир парламент томонидан БМТ билан ядровий ҳамкорликни чеклаш ҳақидаги қонун лойиҳаси қабул қилинганини маълум қилди. Унинг таъкидлашича, Халқаро атом энергияси агентлиги билан муносабатлар янги асосда йўлга қўйилади.
Можаро 22 июнга қараган кечаси АҚШ президенти Доналд Трампнинг Эрондаги учта ядровий объектга — Фордо, Натанз ва Исфаҳонга авиаҳужум уюштирганини маълум қилиши билан бошланган эди. Бунга жавобан, Эрон Қатар ва Ироқдаги АҚШ базаларига ракета зарбалари берган.
Қатар Эроннинг бу ҳаракатини кескин қоралаган ва жавоб қайтариш ҳуқуқини сақлаб қолишини билдирган. Саудия Арабистони ҳам ушбу баёнотни қўллаб-қувватлаган. Бундан сўнг Яқин Шарқдаги бир қатор давлатлар ўз ҳаво ҳудудини вақтинча ёпди.
24 июн куни Эрон ва Исроил ўртасида ўт очишни тўхтатиш бўйича келишув кучга кирди.