Таҳлилларга кўра, Яқин Шарқда Исроил ва Эрон ўртасидаги ўт очишни тўхтатиш келишуви ва АҚШ ҳамда Хитой ўртасида савдо музокараларининг олдинга силжиши инвестицияларни ҳимоявий активлардан акция ва облигацияларга йўналтирди. Натижада, олтинга бўлган талаб пасайди.
АҚШ президенти Доналд Трамп Хитой билан савдо келишуви имзоланганини маълум қилди. Келишув тафсилотлари очиқланмаган бўлса-да, Вашингтон Хитой товарларига божларни 55 фоизга, Пекин эса Америка маҳсулотларига 10 фоизга туширишга рози бўлгани қайд этилди.
Аналитик Владимир Черновнинг таъкидлашича, геосиёсий барқарорлик ҳимоявий активлардан чиқишга олиб келган. Бошқа таҳлилчилар эса олтин нархига таъсир қилган Яқин Шарқдаги хавф омили қисқарганини қайд этмоқда.
Олтин нархининг пасайиши 15-20 фоизлик кечиккан коррекция сифатида баҳоланмоқда. Чернов олтин нархи 3300 доллардан пастга тушганда кейинги қўллаб-қувватлаш даражалари 3180-3220 доллар оралиғида бўлиши мумкинлигини айтди. Агар пасайиш давом этса, нарх 3000 долларгача тушиши мумкин.
Citi таҳлилчилари эса 2026 йилнинг иккинчи ярмига бориб олтин нархи 2500-2700 доллар атрофига тушишини прогноз қилмоқда. Бунга инвестицион талабнинг пасайиши, иқтисодий ўсиш истиқболларининг яхшиланиши ва АҚШ Федерал захира тизими сиёсатининг юмшатилиши сабаб бўлиши мумкин.