Франциянинг Le Figaro нашри таъкидига кўра, бу кон жаҳон аккумулятор саноати учун стратегик аҳамиятга эга.
Шевченко кони 1982 йилда очилган бўлиб, 40 гектар майдонни эгаллайди. Украина Миллий фанлар академияси маълумотларига кўра, бу ерда 90 фоиздан ортиқ юқори минералли сподумен бор, ундан литий қиммат технологияларсиз ҳам қазиб олиниши мумкин. Шунингдек, бу конда тантал, ниобий, бериллий, цезий ва рубидий каби қимматбаҳо металлар захиралари ҳам мавжуд.
Бундан аввал Россия қўшинлари Запорижжя областининг Крута Балка конларини эгаллаган эди. Ҳозирда Россия Украинадаги тўртта йирик литий конларидан иккитасини назорат қилмоқда. Қолганлари — Добра ва Полоховске конлари Кировоград областида жойлашган бўлиб, улардан литий олиш қимматга тушади. Украинада умумий литий захиралари 500 минг тонна деб баҳоланган.
Апрел ойида Украина ва АҚШ минерал ресурслар бўйича стратегик битим тузди. Унга кўра, америкалик сармоядорлар иштирокида инвестиция фонди ташкил этилиб, конларни ривожлантириш ва Украина тикланишига маблағ йўналтирилиши режалаштирилган. Шу билан бирга, Доналд Трампнинг яқин дўсти Роналд Лаудер Добра конларини ривожлантиришда эҳтимолий иштирокчи сифатида тилга олинмоқда.