Канадада кичик ва ўрта бизнес вакиллари АҚШ билан давом этаётган тарифлар урушида асосий муаммо сифатида ноаниқликни қайд этмоқда. Торонто шаҳри яқинида жойлашган Taurus Craco компанияси раҳбари Уэс Лаве фикрича, бизнесда аниқ режа йўқлиги фаолият учун энг йирик хатардир. Уларнинг компанияси АҚШга импорт қилинадиган ускуналар учун кескин тарифлар ортидан катта маблағ тўлашга мажбур бўлган.
2025 йил бошидан буён АҚШ президенти Доналд Трамп Канада маҳсулотларига бир неча бор тарифлар жорий қилган, сўнг уларни вақтинча тўхтатган, кейин яна қайта жорий қилган. Бу ҳолат канадалик тадбиркорларнинг ишончини сўндиради. Трампнинг сўнгги баёнотида Канада билан барча савдо музокараларини тўхтатишини эълон қилгани вазиятни янада чигаллаштирди.
Канада Бош вазири Марк Карни бу тарифларни «адолатсиз» деб атаб, АҚШга нисбатан жавоб тарифи жорий қилиш билан таҳдид қилган. Бу орқали Канада ўз манфаатларини ҳимоя қилмоқчи. Канадалик тадбиркорлар эса фақат бир нарсани исташмоқда: аниқ қоидалар ва барқарорлик.
Канада Савдо палатаси маълумотларига кўра, ҳозирда экспортёрларнинг 56 фоизи тарифларнинг таъсирини камайтириш учун чоралар кўрмоқда. Улардан 30 фоизи йирик инвестицияларни кечиктирган, 25 фоизи эса АҚШдан ташқари мижоз излашга ҳаракат қилмоқда. Бу даврда АҚШга экспорт 15 фоизга пасайган, айниқса, металл ва автомобил экспортлари кескин камайган.
Хизмат кўрсатиш соҳаси ҳам ноаниқликдан жабр кўрмоқда. ElevatIQ консалтинг компанияси раҳбари Сэм Гуптанинг айтишича, бу соҳанинг бозордаги ўрни деярли назар-писанд қилинмаяпти. Унинг сўзларига кўра, уларнинг хизматларига бўлган сўровлар 50 фоизга камайган. Унинг таъкидлашича, бизнеслар ҳозирча катта инвестиция қилишдан бош тортаётгани кузатилмоқда.
Шу билан бирга, тадбиркорлар ҳозирги оғир шароитларга қарамай, ўз фаолиятларини давом эттиришга ҳаракат қилмоқда. Уэс Лаве «биз қоидаларга амал қилишга тайёрмиз, фақат уларни ўйин давомида ўзгартиришмасин», деб таъкидлади.