2025 йилда Доналд Трамп бошчилигидаги АҚШдаги савдо урушлари ва кескин тариф таҳдидлари ортидан сармоядорлар тобора Европага эътибор қаратмоқда. Reuters хабарига кўра, инвесторлар Европа бозорларига ҳозирда янада ишонч билан қарамоқда.
Люксембургда жойлашган H2Apex компанияси раҳбари Петер Рёсснернинг таъкидлашича, АҚШдаги тарифлар хавфи туфайли улар Америка етказиб берувчилардан воз кечишга мажбур бўлган. «Инвесторлар эндиликда Европа бозорига кўпроқ қизиқмоқда. Бу ерда шароит идеал эмас, лекин барқарор», деди у.
Охирги ойларда Европа инвестициялар учун марказга айланмоқда. Бунга АҚШда Доналд Трампнинг нотинч ва ўзгарувчан тариф сиёсатлари асосий сабаб бўлмоқда. Инвесторлар ҳар қандай пайтда янги давлат аралашуви бўлиши мумкинлигидан хавотирда.
LSEG маълумотларига кўра, жорий йилда Европа акция фондларига 100 миллиард доллардан ортиқ маблағ киритилган, АҚШдан эса қарийб 87 миллиард доллар маблағ чиқариб кетилган. АҚШ акция фондларидан 12 ойнинг 7 ойида маблағлар олиб чиқилган.
Европа Марказий банки президенти Кристин Лагард бу тенденцияни сармоядорларнинг Европага ишончи кучайгани сифатида баҳолади. Holcim компаниясининг Европа бозорига йўналган акциялари 15 фоизга қимматлашгани ҳам шундай муҳит яратиб берди.
Siemens Energy молия директори Мария Ферраро ҳам АҚШда сармоядорлар кайфияти ўзгарганини таъкидлади. Германияда эса хорижий тўғридан-тўғри инвестициялар жорий йилнинг илк тўрт ойида 46 миллиард еврони ташкил этган ва бу 2022 йилдан буён энг юқори кўрсаткич бўлди.
Шу билан бирга, Германия компаниялари йил бошидан буён АҚШдаги инвестицияларни қисқартирмоқда. Бироқ мутахассислар Европа бу имкониятдан унумли фойдаланиши ва инвестиция муҳитини янада яхшилаши лозимлигини таъкидламоқда.
KfW раҳбари Стефан Винтелс ва Altor фонди ҳамкорлари бу имконият абадий эмаслигини, Европа шошилиш кераклигини қайд этишган. Deutsche Bank раҳбари Кристиан Севинг ҳам Европа ва Германияга қизиқиш катта эканини, лекин узоқ муддатли барқарорлик муҳимлигини эслатди.