Financial Times ёзишича, Joby Aviation компанияси томонидан Дубайда ўтказилган синов парвозларида eVTOL туридаги аппарат вертикал учиш, горизонтал парвоз ва вертикал қўнишни амалга оширди. Бу жараён технологияни тижорат йўналишига жорий этишда муҳим босқич бўлди. Апрел ойида компания шунга ўхшаш синовни Калифорнияда ҳам ўтказган, бироқ Дубайдаги синовлар тўғридан-тўғри хизмат бошланиши арафасида ўтказилди.
Компаниянинг бош директори Пол Сиарранинг таъкидлашича, ҳаво такси хизматлари инсоният томонидан анча йиллардан бери кутилган ва эндиликда улар қачон ва қандай фойда келтириши аниқлашмоқда. Унинг сўзларига кўра, хизмат дастлаб Дубайда ишга туширилади ва кейинчалик бутун дунё бўйлаб кенгайтирилади.
Joby 2009 йилда ташкил топган ва ҳозиргача 2 млрд доллардан ортиқ инвестиция жалб этган. Компаниянинг энг йирик шерикларидан бири — Toyota. Компания ишлаб чиқарган ҳаво такси 320 km/h тезликка эга бўлиб, бир пилот ва тўрт йўловчи учун мўлжалланган. Дубай халқаро аэропортида биринчи тижорат қўниш майдони қурилиши бошланган.
Joby ҳозирда маҳаллий авиация назорати органлари билан сертификатлаш жараёнидан ўтмоқда ва АҚШнинг FAA рухсатини олиш учун ҳам иш олиб бормоқда. Компания дастлаб рухсатни Дубайдан, сўнг АҚШдан олишни режалаштирмоқда.