АҚШ президенти Доналд Трамп маъмурияти Ҳарвард университетини яҳудий ва Исроиллик талабаларга нисбатан адолатсиз муносабатда айблади. Расмийларга кўра, Ҳарвард баъзи ҳолатларда бефарқ бўлиб, айрим вазиятларда эса яҳудий талабалар, ўқитувчилар ва ходимларга нисбатан антисемитик таъқибларда иштирок этган.
Маълумотларга қараганда, университетда таҳсил олаётган яҳудий талабаларнинг кўпчилиги ўзларини камситилган деб ҳис қилган ва тўртдан бири жисмоний хавфсизлигидан хавотир олган.
АҚШ ҳукумати Ҳарварддан бу каби ҳолатларга барҳам бериш бўйича зудлик билан чора кўришни талаб қилди. Акс ҳолда, университет барча федерал молиявий маблағларидан маҳрум қилиниши мумкинлиги айтилди. Лекин қандай ислоҳотлар талаб қилиниши аниқ кўрсатилмади.
Ҳарвард университети бу айбловларга муносабат билдириб, антисемитизмга қарши жиддий чоралар кўрилганини таъкидлади. Таҳсил олаётган яҳудий ва Исроиллик талабаларга ҳурмат билан муносабатда бўлиш учун доимий ҳаракат қилинаётгани қайд этилди.
Оқ уй матбуот котиби Каролин Левиттга кўра, Ҳарвард ва Трамп маъмурияти ўртасида музокаралар ёпиқ эшиклар ортида олиб борилмоқда.
Бу зиддият АҚШ университетларида Исроилнинг Ғазога қарши урушини қоралаётган талабалар намойишларидан сўнг авж олган. Трамп бундай намойишларни ноқонуний деб баҳолаб, иштирокчиларни антисемитизмда айблаган. Аммо намойишчилар бу фаолиятларини тинч йўл билан инсон ҳуқуқлари бузилишига қарши чиқиш деб таърифлаган.
Маълум қилинишича, Трамп маъмурияти Ҳарварднинг 2,5 млрд доллар миқдоридаги федерал грант маблағларини музлатиб қўйган. Шунингдек, университетни халқаро талабаларни қабул қилиш ҳуқуқидан маҳрум қилиш ва солиқ имтиёзларини бекор қилиш билан таҳдид қилган.
Трамп маъмурияти Ҳарварддан барча шаклдаги афзалликларни, шу жумладан, профессор-ўқитувчилар ва талабаларни танлашдаги имтиёзларни бекор қилишни талаб қилган. Шунингдек, ҳукумат терроризм ёки антисемитизмни қўллаб-қувватловчи халқаро талабаларни қабул қилишга йўл қўймасликни талаб этган.
Ҳарвард ушбу талабларни рад этган ва ҳукуматга қарши судга мурожаат қилган. Трамп маъмурияти шунингдек, Колумбия, Корнелл ва Нортвестерн каби етакчи университетларга ҳам босим ўтказмоқда.
Ой бошида Колумбия университетининг 400 млн долларлик федерал маблағлари қисқартирилган. Университет баъзи талабларни қабул қилган ва ички тартибларини ўзгартиришга мажбур бўлган.
Бошқа университетлар ҳам ҳукуматнинг бундай босимлари илмий эркинлик ва сўз эркинлигига таҳдид эканини таъкидламоқда.