Илон Маск АҚШ Конгресси Трамп таклиф қилган солиқ имтиёзлари ҳақидаги «Катта ажойиб қонун лойиҳаси»ни қабул қилса, »Америка партияси»ни тузишини маълум қилди. Бунга жавобан собиқ президент Дональд Трамп Маскни давлат субсидияларидан маҳрум этиш таклифини илгари сурди.
Маск Х ижтимоий тармоғидаги баёнотида: «Агар бу аҳмоқона харажатлар тўғрисидаги қонун лойиҳаси қабул қилинса, эртаси куни Америка партияси тузилади (https://x.com/elonmusk/status/1939806847504105683)», дея ёзди. Унинг таъкидлашича, мамлакат икки партияли тизимдан чарчаган ва халқга ҳақиқий танлов керак.
Маск аввалроқ янги сиёсий ҳаракат тузиш борасида сўровнома ўтказган бўлиб, 5,6 миллион фойдаланувчининг 80 фоиздан кўп қисми ушбу ғояни қўллаб-қувватлаган. Унинг сўзларига кўра, мамлакат аҳолисининг катта қисми сиёсий нуқтаи назардан чап ёки ўнг қанотга эмас, ўртага яқин туради.
Бу баёнотлардан сўнг Трамп ўзининг Truth Social тармоғида Маск электромобилларга берилган субсидиялар ҳисобига катта ютуқларга эришганини эслатди. Унинг фикрича, агар давлат ёрдами бўлмаганида, Маск бизнесини ёпиб, Жанубий Африкага қайтишига тўғри келган бўларди.
Шунингдек, Трамп АҚШ молиявий тежамкорликни таъминлаш учун ракета ва электромобиллар лойиҳаларини қўллаб-қувватлашни тўхтатиш кераклигини айтди. У Давлат самарадорлиги департаменти (DOGE)ни Маскни субсидиялардан маҳрум қилиш масаласини кўриб чиқишга чақирди.
Маск эса ўз навбатида: «Мен том маънода ҲАММАСИНИ ТЎХТАТИШНИ сўрайман. ҲОЗИРОҚ», — дея кескин жавоб қайтарди.