АҚШ Президенти Доналд Трамп Япония билан савдо музокаралари бўйича келишувга эришилмаса, мамлакатга 30 ёки 35 фоизлик бож тўловлари жорий этилиши мумкинлигини маълум қилди. У бу ҳақда 1 июл куни Вашингтонда журналистларга билдирган.
Трампнинг таъкидлашича, бу божлар 2 апрел куни жорий қилинган 24 фоизлик божлардан анча юқори бўлади. Шу куни Трамп дунё мамлакатларига катта импорт божларини эълон қилган эди. Кейинчалик Япония ва бошқа кўплаб давлатлар учун божлар вақтинчалик 10 фоизга туширилган ва 90 кун музокаралар учун берилган эди.
Бу муддат 9 июл куни якунланади ва Трамп уни узайтириш нияти йўқлигини таъкидламоқда. У Япония билан келишув бўлишига шубҳа билан қараётганини билдирган. «Япония билан музокара олиб бордик. Фикримча, келишув бўлмаслиги мумкин» деди Трамп Air Force One бортида журналистларга.
Япония расмийлари Трампнинг бу таҳдидига жавоб беришдан бош тортди. Япония Бош вазири ўринбосари Кадзухико Аоки бу масалада изоҳ бермаганини билдирди.
Айни пайтда Япониядан АҚШга экспорт қилинаётган маҳсулотларнинг аксарияти 10 фоизлик бож тўламоқда. Шунингдек, япон автомобиллари ва эҳтиёт қисмларига 25 фоиз, пўлат ва алюминийга эса 50 фоизлик бож қўлланмоқда.
Япония Бош котиби Йошимаса Хаяши эса, АҚШ билан келишув қилиш учун Япония фермерларининг манфаатларига зарар етказадиган ҳеч қандай имтиёз бериш нияти йўқлигини маълум қилди.
Трамп эса Японияни АҚШдан гуруч харид қилмасликда танқид қилиб, Японияда гуруч танқислиги борлигини қайд этган. У бу фикрларини Truth Social орқали билдирган.
Трамп 90 кунлик музокаралар давомида 90 та савдо келишуви имзолашини айтган эди, аммо бу вақт ичида фақат Буюк Британия АҚШ билан келишувга эришди.