Европа бозорида хитойлик автоконцернлар таъсири тобора ортяпти. Май ойи якунларига кўра, хитой автомобиллари гибрид сегментида рекорд даражада улушга эга бўлди. Электромобиллар соҳасида эса улар сўнгги 10 ой ичидаги энг юқори бозор улушини қўлга киритди.
Бу ҳолат биринчи марта қайд этилмоқда: Хитойда ишлаб чиқарилган автомобилларнинг Европа бўйича умумий рўйхатдан ўтказилиши 5 фоиздан ошди. Бу кўрсаткич ички ёниш двигателига эга моделларни ҳам ўз ичига олади.
Таҳлилчиларга кўра, Хитой автосаноати бу ютуққа асосан аккумулятор технологияси ва дастурий таъминот соҳаларидаги устунлик орқали эришмоқда. Электр ва гибрид транспорт воситаларидаги инновацион ечимлар европалик истеъмолчилар учун жозибадорлик касб этмоқда.
Европада экологик тоза транспортга бўлган талаб ошиб бораётган бир пайтда, Хитой автоконцернлари ушбу эҳтиёжни рақобатбардош нарх ва замонавий технологиялар орқали қондиришга ҳаракат қилмоқда.
Мутахассислар фикрича, бу жараён Европа автомобил саноати учун жиддий рақобатчилик даври бошланганини англатади.