Исроилнинг Yedioth Ahronoth нашри ёзганидек, июн ойида Исроил армияси учун энг қонли ой бўлиб қайд этилди. Энг катта йўқотишлар 24 июн куни Хон Юнусда рўй берди — ўша куни 15 ҳарбий ҳалок бўлган. Эрон билан бўлиб ўтаётган ўзаро ҳаво зарбаларидан кўра кўпроқ қурбонлар ҲАМАС билан бўлган тўқнашувлар вақтида қайд этилган.
Июл ойи ҳам Исроил армияси учун йўқотишлар билан бошланди. Ғазо сектори шимолида 7-зирҳли танк бригадаси танкисти, сержант Янив Михалович ҳужум натижасида ҳалок бўлди. Унинг танкига қарши ракета билан зарба берилган. Шу жангда танк командири ва яна бир аскар оғир яраланган. Икки нафар аскар ўртача даражада яраланиб, яна бири енгил жароҳат олган.
Шунингдек, Шежайяда бўлиб ўтган яна бир тўқнашувда «Эгоз» махсус бўлинмаси аскари танкига қарши ракета зарбаси натижасида оғир яраланган.
Ўтган ҳафта Исроил армияси Puma бронетранспортёри портлатилганини тан олди. Ушбу ҳодисада машинани ўчириш имкони бўлмаган ва унда бўлган етти нафар аскар тириклай ёниб кетган.
Расмий маълумотларга кўра, 2023 йил октябридан бери Исроил армияси умумий йўқотишлари 6913 нафарни ташкил этди: 881 ҳарбий ҳалок бўлган, 6032 киши яраланган. Шу билан бирга, собиқ бош вазир ва мухолифат етакчиси Яир Лапид ҳукумат ҳақиқий йўқотишлар сонини камайтириб кўрсатаётганини билдирган эди.