БМТнинг Фаластин оккупация қилинган ҳудудларда инсон ҳуқуқлари бўйича махсус маърузачиси Франческа Албанезе тайёрлаган янги ҳисоботида йирик корпорацияларни Исроил билан ҳамкорликни тўхтатишга чақирди. У бу компаниялар раҳбарларини «ноқонуний оккупация, апартеид ва геноцид»га кўмак беришда айблади. АҚШ эса бу ҳисоботни «ҳақоратомуз» деб атади ва Албанезенинг истеъфосини талаб қилди.
Альбанезенинг 24 бетлик ҳисоботида Google, Amazon, Microsoft, Palantir каби 60 дан ортиқ компания номма-ном тилга олинган. Уларнинг маҳсулотлари ва хизматлари Исроил ҳарбий машинасини қўллаб-қувватлашда иштирок этаётгани қайд этилган. Докладда Исроилнинг Ғазога қарши зулми 2023 йил октябридан буён 56,5 мингдан ортиқ фаластинликнинг ҳаётига зомин бўлгани, шу билан бирга Тел Авив биржаси 179 фоизга ўсгани ва бозор қиймати 157,9 млрд долларга кўтарилгани таъкидланган.
Албанезе ҳисоботда оккупация қилинган ҳудудларни «ҳарбий саноат ва технология гигантлари учун синов майдони» деб атади. Elbit Systems, Lockheed Martin каби қурол ишлаб чиқарувчи компаниялар, Microsoft Azure, Google, Palantir каби платформа ва хизматлар репрессияларни автоматлаштиришда иштирок этаётгани қайд этилди.
Вашингтон ҳисоботни кескин танқид қилиб, буни «Американинг ва глобал иқтисодиётнинг сиёсий ва иқтисодий урушини қўзғатиш», дея баҳолади. АҚШ БМТ Бош котиби Антониу Гутеррешдан Албанезени қоралашни ва уни истеъфога чиқаришни талаб қилди. Акс ҳолда «кескин чоралар кўрилишини» маълум қилди.
Албанезе эса Исроилга нисбатан қурол-яроғ эмбаргоси ва компаниялар устидан жиноий жавобгарлик текширувлари ўтказишга чақирди. Бу чақириқлар Исроил Бош вазири Бинямин Нетаняҳу ва собиқ мудофаа вазири Йоав Галлантга қарши чиқарилган Халқаро жиноят суди ордерлари ва БМТ Халқаро судидаги геноцид иши фонида янграётир.