Россия президентининг ёрдамчиси Юрий Ушаков маълум қилишича, 3 июл куни Россия ва АҚШ раҳбарлари ўртасидаги телефон орқали суҳбат қарийб бир соат давом этган. Бу Трамп қайта президентликка киришганидан бери икки давлат раҳбарлари ўртасидаги олтинчи мулоқот ҳисобланади.
Мулоқотда Доналд Трамп Украинада давом этаётган ҳарбий ҳаракатларни зудлик билан тўхтатиш зарурлигини қайд этган. Унга жавобан, Владимир Путин Россия ҳали ҳам сиёсий-дипломатик ечим излашдан қайтмаганини айтган, бироқ ўз олдига қўйган мақсадларидан воз кечмаслигини аниқ билдирган.
Суҳбат АҚШ мустақиллик куни арафасида бўлиб ўтди. Путин Трампни ушбу байрам билан табриклаб, Россия АҚШ давлатчилиги шаклланишида муҳим рол ўйнаганини таъкидлаган.
Икки давлат раҳбарлари Сурия, Эрон ва бутун Яқин Шарқдаги вазиятни ҳам муҳокама қилган.
Суҳбат очиқ, конструктив ва амалий руҳда ўтгани қайд этилган. АҚШ томони эса ҳозирча бу борада расмий изоҳ бермади.