Киев ҳарбий маъмурияти ҳаводаги нишонларга қарши ҳаво мудофаа тизимлари ишга тушганини ва фуқароларни зудлик билан паноҳгоҳларга ўтишга чақирганини маълум қилди. Украина Ҳаво кучлари маълумотига кўра, дронлар Полтава, Черкасск, Житомир, Кировоград ва Днепропетровск областларига ҳам хавф туғдирмоқда. Ҳозирча қурбонлар ва вайронагарчиликлар ҳақида хабар берилмаган.
Бу ҳужум Россия президенти Владимир Путин ва АҚШ президенти Доналд Трампнинг телефон орқали суҳбатидан бир неча соат ўтиб рўй берди. РФ президенти ёрдамчиси Юрий Ушаковга кўра, суҳбатда Путин Россия Украинадаги урушнинг «асосий сабабларини бартараф этишдан» воз кечмаслигини таъкидлаган. Шу билан бирга, Москва музокара йўли билан тинчликка эришиш йўлларини қидиришда давом этишини билдирган. Трамп эса жанг ҳаракатларини тезроқ тўхтатиш зарурлигини қайд этган.
Россиянинг Украина шаҳарларига ҳужумлари мунтазам равишда давом этмоқда. 3 июль кундузи Россия Одесса портига ракета зарбаси берди. Сан-Томе ва Принсипи байроғи остидаги чет эл кемаси метални тушираётган пайтда ракета пирсга урилди. Ҳужумда икки киши ҳалок бўлди, олти киши жароҳатланди.
Британиянинг Ахборот барқарорлиги маркази ва The Wall Street Journal таҳлилларига кўра, 2025 йил бошидан Россия Украина ҳудудига 20 мингдан ортиқ дрон йўллаган. Бу фуқаролар қурбонлари сонининг тахминан 40 фоизга ошишига сабаб бўлган. Май ойидан буён ҳужумлар кескин кучайган. CIR маълумотига кўра, фақат июн ойида 5429 дрон ҳужуми қайд этилган. Солиштириш учун: 2024 йилнинг биринчи ярмида бу кўрсаткич 2315 тани ташкил этган эди.