Қабул қилинган қонун президент Трамп ва Илон Маск ўртасида очиқ можарони келтириб чиқарган эди.
Вакиллар палатаси ва Сенатда қонун лойиҳаси бир неча бор муҳокама қилиниб, ўзгартишлар киритилди. Трамп шахсан норозилик билдирган конгрессменлар билан суҳбатлашиб, уларнинг тўрт нафари фикрини ўзгартиришга эришди. Қонун 3 июл куни якуний кўринишда қабул қилиниб, Президент имзоси учун йўлланди. Трамп ҳужжат 4 июл — Мустақиллик кунига қадар имзоланишини дедлайн сифатида белгилаган.
Қонун лойиҳаси қуйидаги чора-тадбирларни ўз ичига олади:
- 2018 йилда Трамп даврида киритилган солиқ имтиёзларини узайтириш, корпорациялар учун солиқ ставкаси 35 фоиздан 21 фоизга туширилади;
- Чойчақа ва ортиқча иш вақти учун солиқ имтиёзи;
- давлат қарзи лимитини 5 трлн долларга ошириш;
- SALT солиқ имтиёзи лимитини 10 минг доллардан 40 минг долларга кўтариш;
- автокредит фоизларига солиқ имтиёзи ва болалар учун имтиёзларни ошириш;
- «Трамп омонат ҳисоблари» — 2025–2028 йиллар оралиғида туғилган болалар учун давлатдан 1000 доллар ҳисобга туширилади;
- ҳарбий харажатлар ва чегараларни муҳофаза қилиш учун 350 млрд доллар ажратиш, жумладан Мексика чегарасида девор қуриш учун 46,5 млрд доллар.
Қонун ижроси учун маблағ Medicaid ва SNAP дастурларини қисқартириш, шунингдек, қайта тикланувчи энергетика лойиҳалари учун имтиёзларни бекор қилиш орқали таъминланади. Лекин бу чоралар 2034 йилга қадар бюджет танқислигини 3,3 трлн долларга ошириши мумкин, деб баҳоламоқда мустақил таҳлилчилар.
Маск мазкур қонун лойиҳасига қарши чиқиб, ўзининг «Америка партияси»ни тузиш билан таҳдид қилди. Трамп эса давлат қўллаб-қувватлашини тўхтатиш ва ҳатто Маскни депортация қилиш масаласини кўриб чиқишини маълум қилган эди.