АҚШ Президенти Доналд Трамп Россия Президенти Владимир Путин билан телефон орқали мулоқотдан сўнг суҳбатдан қаттиқ норози бўлганини билдирди. Трампнинг айтишича, Путин Россиянинг Украинага қарши урушини тўхтатиш истагини билдирмаган.
Трамп ушбу фикрларини Айова штатидан Вашингтонга қайтиши чоғида журналистларга айтди. У Путин билан кеча суҳбатлашганини, лекин бу мулоқотдан ҳеч қандай ижобий натижага эришмаганини таъкидлади. «Мен у бу урушни тўхтатмоқчи деб ўйламайман. Бу жуда афсусланарли», — деди Трамп.
Кремл ёрдамчиси Юрий Ушаков маълум қилишича, икки давлат раҳбарлари суҳбат чоғида АҚШнинг Украинага қурол етказиб беришни қисман тўхтатиши масаласини муҳокама қилмаган. Суҳбатдан бир неча соат ўтиб, Россия дронлари Киев яқинидаги турар-жой биноларини зарбага олган. Украина шаҳарларида ҳам ҳужумлар давом этган ва шарқдаги ҳужумлар оқибатида камида беш киши ҳалок бўлган.
Трамп Украина Президенти Володимир Зеленский билан телефон орқали мулоқот қилиши режалаштирилганини маълум қилди. Зеленский бу суҳбатни кутиб, АҚШ қуролларининг тўхташи Украина учун жиддий хавф туғдиришини таъкидлаган.
Трамп қурол етказиб бериш тўлиқ тўхтатилаётгани йўқлигини айтган бўлса-да, собиқ Президент Жо Байденни Украинага ортиқча қурол беришда айблади. «Биз қурол берамиз, лекин жуда кўп бердик. Байден мамлакатимиз қуролларини деярли бўшатиб юборди», — деди Трамп.
Кремл АҚШ билан мулоқотни давом эттиришга тайёр эканини, аммо тинчлик музокаралари Москва ва Киев ўртасида ўтиши кераклигини билдирди. Россия АҚШ иштирокида уч томонлама музокарадан қочаётгани қайд этилди.
Трамп ва Путин юзма-юз учрашув масаласини муҳокама қилмагани маълум қилинди.