Аҳоли давлат банкларидан жами 101,84 трлн сўм, хусусий банклардан эса 91,9 трлн сўм кредит олган. Аҳоли энг кўп мурожаат қилган банклар рўйхатида биринчи ўринни «Ипотека банк» эгаллади. Банк аҳолига 24,5 трлн сўм кредит ажратган. Умумий кредит портфелининг 69,2 фоизи жисмоний шахсларга тўғри келади. Банк 2023 йилда хусусийлаштирилган.
Иккинчи ўринда «Халқ» банки турибди. Банк аҳолига 22,46 трлн сўм кредит берган бўлиб, портфелининг 75 фоизи жисмоний шахсларга ажратилган. Унинг асосий йўналишлари ижтимоий ва истеъмол кредитлари ҳисобланади.
«Ўзмиллийбанк» 19,9 трлн сўм билан учинчи ўринни эгаллади. Унинг катта қисми йирик корхоналарни молиялаштиришга йўналтирилган бўлса-да, аҳолига ҳам салмоқли кредит ажратган.
Кейинги ўринларда «Капиталбанк» (18,51 трлн сўм), «Бизнесни ривожлантириш банки» (12,69 трлн сўм), «Агробанк» (11,16 трлн сўм), «Ўзсаноатқурилишбанк» (10,4 трлн сўм), «TBC Bank» (9,77 трлн сўм), «Асакабанк» (9,5 трлн сўм) ва «Микрокредитбанк» (8,1 трлн сўм) жойлашган.
Айниқса, рақамли хизмат кўрсатувчи TBC Bank аҳоли орасида оммалашиб бормоқда, унинг кредит портфелининг 95 фоизи жисмоний шахсларга ажратилган.