Еврокомиссия АҚШнинг импорт товарларига жавоб тарифи сифатида 112 млрд долларлик ҳажмда бож тўловлари жорий этишни режалаштираётгани маълум қилинди. Бироқ бу қарор Европа иттифоқи ичида турли норозиликларга сабаб бўлмоқда.
Mercedes, BMW, Volkswagen, LVMH ва Sanofi каби Европа бизнесининг йирик вакиллари тўғридан-тўғри Доналд Трамп жамоаси билан музокаралар олиб бормоқда. Улар ўз маҳсулотларини жавоб чораларидан мустасно қилишга уринишмоқда.
Шунингдек, Cognac ва Irish Whiskey лоббистлари алкоголь маҳсулотларини жавоб божлари рўйхатидан чиқариш учун ҳаракат қилмоқда. Айни пайтда Еврокомиссия 95 млрд евро бўлиши керак бўлган бож тўловларини бизнес ва айрим ҳукуматлар босими остида 25 млрд еврога қисқартириш хавфига дуч келмоқда.
Европа компаниялари АҚШда ишлаб чиқариш юқори даромад келтиришини таъкидламоқда ва Америка бозорини йўқотишни истамайди. Шунингдек, жавоб чоралари АҚШнинг қўшимча санкциясига сабаб бўлиши, бу эса Европа автомобил ва фармацевтика маҳсулотларининг таннархини ошириши мумкин.
Бир қатор компаниялар ўз ишлаб чиқариш линияларини АҚШга кўчириб улгурган. Масалан, Mercedes GLC моделини Алабамада, BMW ва Volvo эса янги заводлар очган.
Европа бизнесининг бундай позицияси келгусида Хитой билан музокараларда ҳам Европа иттифоқининг кучли тарғиботини заифлаштириши мумкин. Коллектив босим сиёсатининг бузилиши Европа нуфузига таъсир қилиши мумкин.
LVMH раҳбари Бернар Арно Брюсселни келишувга чақириб, эркин савдо ҳудуди тижорат урушидан яхшироқ эканини таъкидлаган.