АҚШда янги сиёсий партия — «Америка» партиясини ташкил этиш бўйича Илон Маскнинг ғояси жамоатчиликда қизиқиш уйғотмоқда. Quantus Insights компанияси ўтказган сўров натижаларига кўра, америкаликларнинг тахминан 40 фоизи ушбу ташаббусни қўллаб-қувватлашга ёки унга овоз беришга тайёр эканини билдирган.
Сўровда айтилишича, бу ғоя айниқса ёш сайловчилар ва республикачи эркаклар ўртасида катта қизиқиш уйғотган. Бироқ, қатнашчиларнинг 38 фоизи партия ташкил этилишига қарши эканини айтган, яна 22 фоизи эса аниқ фикр билдирмаган.
Тадқиқотчиларнинг таъкидлашича, айрим сайловчилар мамлакатдаги ҳозирги сиёсий тузум ўзини тўлиқ ифода этолмаётганини ҳис қилмоқда. Шу боис улар янги сиёсий кучга эҳтиёж сезмоқда. Айниқса, ёши катта сайловчилар ва Демократик партия тарафдорлари бундай ташаббусга шубҳа билан қарамоқда.
Сўровнома 30 июндан 2 июлгача 1000 нафар АҚШ фуқароси ўртасида ўтказилган бўлиб, натижаларда статистик хато даражаси 3 фоизни ташкил қилади.
Маск ижтимоий тармоқда «Руҳлантиради», дея ўз муносабатини билдирган. У июнь ойи охирида янги партия ташкил этиш масаласини яна кўтариб чиққан эди. Унинг «Америка» партияси ғояси, асосан, Дональд Трамп томонидан таклиф этилган федерал харажатларни қисқартиришга оид қонун лойиҳасига қарши чиқиш натижасида вужудга келган.