Financial Times нашрининг ёзишича, Исроил ва Туркия ўртасида қарама-қаршилик сўнгги пайтларда янада кескинлашган. Хусусан, 12 кунлик Исроил ва Эрон ўртасидаги уруш минтақадаги кучлар мувозанатини ўзгартирган. Исроил ўзини минтақанинг етакчи кучига айлантиришга интилмоқда, Туркия эса бундан жиддий хавотирга тушган.
Туркия Ташқи ишлар вазири Ҳакан Фидан яқинда Ислом ҳамкорлик ташкилоти йиғилишида «Фаластин, Ливан, Сурия, Яман ёки Эрон муаммоси йўқ, асосий муаммо Исроил» деб баёнот берди. Туркия расмийлари Исроилнинг минтақада фаол кучайиши Анқара учун тўғридан-тўғри хавф деб баҳоламоқда.
Исроил томонида эса Туркиянинг таъсири Эрондан ҳам катта таҳдид сифатида кўрилаётгани қайд этилган. Туркия президенти Режеп Таййип Эрдўғоннинг ХАМАСни очиқ қўллаб-қувватлаши Исроил ҳукуматида қаттиқ норозилик уйғотган. Шу сабабли Исроил Сурия курдлари билан алоқаларни кучайтирмоқда, бу эса Анқарани янада безовта қилмоқда.
Мутахассисларга кўра, Суриядаги вазият энг яқин можаро нуқтасига айланиши мумкин. Туркия бу ерда ўз таъсирини кучайтириб, шимолий ҳудудларни назорат қилмоқда. Исроил эса жанубда буфер зоналар яратиб, курдлар ва друзларга ёрдам бермоқда. 2025 йил апрел ойида Исроил Туркия учун мўлжалланган ҳарбий базани бомбардимон қилган.
Ҳозирги кунда икки мамлакат ўртасида фақат ҳарбий алоқа учун телефон линияси мавжуд, аммо кенг қамровли дипломатик музокаралар тўхтаган. Туркия Исроилнинг Эронга қарши урушда қўллаган юқори аниқликдаги ҳаво зарбалари ва разведка имкониятларидан сабоқ чиқармоқда.
АҚШ президенти Доналд Трамп ушбу вазиятда икки иттифоқчини бир-бирига қарши қўймаслик учун дипломатик ечим изламоқда. Ғазо уруши тугатилиши Туркиянинг асосий эътирозларини юмшатиши мумкин, лекин икки давлат ўртасидаги рақобат узоқ муддатли бўлиши тахмин қилинмоқда.
Financial Times таҳлилчиси Аслы Айдынташбашнинг таъкидлашича, Туркия ва Исроил кўп йиллар АҚШнинг минтақавий таянчлари бўлган, аммо энди бу икки кучнинг тўғридан-тўғри қарама-қаршилиги янги хавф манбаи бўлиб чиқмоқда.