Бу ҳақда АҚШнинг Сурия бўйича махсус вакили ва Туркиядаги элчиси Томас Баррак маълум қилди. Баррак Байрутда Ливан президенти Жозеф Аун билан учрашувдан сўнг ўтказган матбуот анжуманида музокаралардан қониқиш билдириб, Ливан томони «ижобий ва ўйланган» жавоб тақдим этганини айтди. Унинг таъкидлашича, АҚШ ва Ливан «ҳаракатлар режаси устида ишламоқда» ва бу жараёнда очиқ мулоқот муҳим аҳамият касб этади.
Ливан расмийлари мамлакатда қурол фақат давлат қўлида бўлиши кераклигини таъкидлаб, Исроилдан 2024 йил ноябрида эришилган оташкесим шартларига риоя этишни талаб қилмоқда. Баррак эса «Ҳизбуллоҳ»нинг сиёсий партия сифатида келажагини кўриши, ҳаракатга фақат қарши бўлган йўл эмас, балки тинчлик ва фаровонликка олиб борувчи имконият сифатида қаралиши кераклигини урғулади.
AFP агентлиги манбаларига кўра, Ливан ҳукумати Вашингтонга дастлабки жавоб вариантини юборган ва АҚШ унда ўзгартишлар сўраган. Шундан сўнг ливанлик амалдорлар ҳужжатнинг якуний шаклини ишлаб чиқди.
Баррак Ливанни минтақа ривожи ортидан қолаётгани ҳақида огоҳлантириб, Сурия ва Исроил ўртасида музокаралар бошланганини, Ливан эса ўз ёндашувини қайта кўриб чиқиши зарурлигини таъкидлади.
Ноябрда имзоланган оташкесимига кўра, «Ҳизбуллоҳ» жангарилари Литани дарёсидан шимолига, Исроил чегарасидан 30 км узоққа олиб чиқилиши, Исроил эса Ливандан чиқиб кетиши керак эди. Аммо Исроил бешта стратегик ҳудудни назоратда сақлаётгани, зарбаларни давом эттираётгани ва «Ҳизбуллоҳ»нинг қуролсизланиши суст кетмоқда деб таъна қилаётгани қайд этилган. Ливан томони эса жанубдаги ҳаракат инфраструктураси демонтаж қилинганини билдирган.
«Ҳизбуллоҳ» раҳбари Наим Қосим эса яқиндаги чиқишида ҳаракат Исроил босими остида таслим бўлмаслигини маълум қилиб, аввал Исроил оккупацияни тугатиши, асирларни озод қилиши кераклигини айтди. Шундан сўнг, Ливан миллий хавфсизлик стратегиясини, шу жумладан «Ҳизбуллоҳ»нинг эҳтимолий қуролсизланишини муҳокама қилишга тайёр бўлади.