The Times нашрининг ёзишича, Сурияда ҳокимиятни вақтинча ўз қўлига олган ва «Ҳайъат Таҳрир аш-Шом» гуруҳининг етакчиси ҳисобланган Аҳмад аш-Шаръа Доналд Трамп маъмуриятига санкцияларни бекор қилиш эвазига табиий ресурслардан фойдаланиш ҳуқуқини таклиф қилган. Ушбу келишув Украина билан тузилган сўнгги ресурс шартномасига ўхшатилмоқда.
Маълумотга кўра, Шаръа Дамашқда «Трамп минораси» қурилиши ҳам мумкинлигини билдирган. Бу ташаббус ортида Саудия Арабистони ва Туркиянинг юқори лавозимли расмийлари туриши мумкинлиги тахмин қилинмоқда. Музокараларнинг ташкил этилишидан аввал Шаръа ва Трамп Саудия Арабистонида учрашиши кутилган эди. Аммо 12 май куни кечқурун учрашув бекор қилинди. Тҳе Тимес маълумотига кўра, АҚШ миллий разведка бошлиғи Тулси Габбард ушбу музокараларга қарши чиққан.
Трамп Вашингтондан чиқишидан олдин Оқ уйдаги брифингда Сурияга нисбатан санкцияларни қайта кўриб чиқиш мумкинлигини билдирган. Унинг таъкидлашича, Туркия президенти Ражаб Тоййиб Эрдўған ҳам Сурияга нисбатан чекловларни юмшатишни сўраган.
Агар келишув амалга ошса, бу Трамп маъмурияти учун Яқин Шарқдаги янги геосиёсий стратегик ҳаракат сифатида баҳоланиши мумкин. Бу орқали АҚШ Суриядаги энергетика ресурслари устидаги таъсирини қайта тиклашга интилаётганини кўриш мумкин.