Тошкент шаҳридаги «Жажжи ниҳоллар» номли нодавлат мактабгача таълим муассасасида 2 ёшли бола тарбиячи ва услубчи томонидан 3 кун давомида калтакланиб, оғзига чойшаб тиқилиб, полга улоқтирилиши оқибатида вафот этди. Суд тарбиячига 6,5 йил, услубчига 3 йил жазо тайинлади. Vaqt.uz мухбири суд тафсилотлари билан танишди.
Суд ҳужжатга кўра, А.Л. ва Ғ.В. ўтган йилнинг 9-11 декабр кунлари оралиғида 2022 йилда туғилган З.А. ни овқатланиш ва ухлашни хоҳламагани учун қийнаб, танасининг турли қисмларидан урган, кийимларидан тортиб судраган ҳамда ётган ҳолида тепган, бир неча бор улоқтириб юборган.
Олмазор туман жиноят ишлари бўйича суди 2024 йил 4 июл куни бўлиб ўтган мажлисда судланувчиларнинг ҳаракатларини ҳар томонлама ўрганиб чиқди. Суд маълумотига кўра, 2024 йилнинг 11 декабр куни А.Л. доимгидай соат 8:00 ларда ишга бориб, ўзига бириктирилган гуруҳга келган болаларни ота-онасидан соғ-саломат қабул қилиб олган. Уларга эрталабки нонуштасини бериб, сўнг машғулот ўтказган. Тушлик вақтида болаларга овқат берган. Шундан сўнг уларнинг ухлаши учун кроватига ётқизган. Ўша пайтда З.А. кроватга ётмасдан нариги хона эшиги олдида йиғлаб турган. Бундан жаҳли чиққан тарбиячи уни оёғи билан 3 марта тепган. Биринчи марта тепганда З.А. танаси билан деворга урилган, сўнг уни кўтариб келиб, кроватга улоқтириб юборган. Ўша пайтда услубчи Ғ.В. кириб келган. У йиғлаб ётган З.А.ни қўли билан туртиб кўрган. Кейин эса кўтариб кроватига отиб юборган ва «ухламасанг ўлдираман», деб таҳдид қилиб, хонадан чиқиб кетган.
Орадан 2-3 дақиқа вақт ўтиб, тарбиячи боланинг ўрнидан туриб олганини кўрган ва унинг олдига бориб, юзига шапалоқ туширган. Тахминан 10-15 дақиқадан сўнг З.А. яна ётган жойидан бошини кўтарган. Тарбиячи унга яна ухлашини айтиб, юзига 2 марта урган. У орадан яна 10-15 дақиқа ўтиб, боланинг барибир ухламаганини кўрган ва «бўғиб қўяман ҳозир», деб уни яна отиб юборган. Бола бу орада ухламай йиғлайверган. Тарбиячи эса унинг овозини ўчириш мақсадида оғзига чойшаб тиққан ва бир неча марта оғзини қўли билан ёпиб, бўғиб, юзига урган.
Шунда ҳам бола тинчланавермагач, тарбиячи уни зарб билан полга отиб юборган. Бола эса кўзи очиқ ҳолатда ҳаракатсиз бўлиб қолган. А.Л. уни ҳожатхонага олиб кириб, юзини ювган, кейин эса жойига ётқизиб қўйган. Боланинг ҳаракатсиз ётганидан қўрқиб кетган тарбиячи бошқа ходималарни чақирган. Болага биринчи ёрдам кўрсатишга ҳаракат қилинган, аммо у ўзига келмаган. Шундан сўнг тез тиббий ёрдам ходимлари етиб келиб, уни шифохонага олиб кетган. З.А. кўрсатилган тиббий муолажаларга қарамасдан 2024 йил 14 декабр куни шифохонада вафот этган.
Суд жараёнида А.Л. ҳам , Ғ.В. ҳам қилган ишларига тўлиқ иқрор бўлди. А.Л. ўз кўрсатмасида қилган ҳаракатларини жаҳл устидан амалга оширганини айтди ва суддан енгиллик сўради.
Суд А.Л.ни Ўзбекистон Республикаси Жиноят кодексининг 104-моддаси 3-қисми «д» банди (қасддан баданга оғир шикаст етказиш, жабрланувчининг ўлишига сабаб бўлиши) бўйича айбли деб топди. Жиноят кодексининг 57-моддасига асосан, унга 6 йил 6 ой муддатга озодликдан маҳрум қилиш жазоси тайинланди. У жазони умумий режимдаги колонияда ўтайди.
Ғ.Б. эса 2022 йилда туғилган болага нисбатан қийноқ қўллаганлиги учун Ўзбекистон Республикаси Жиноят кодексининг 110-моддаси 2-қисми «а,в» бандлари (ёши кичик шахсга нисбатан қийнаш) билан айбли деб топилди. Суд унга 3 йил муддатга озодликни чеклаш жазосини тайинлади.