Малайзия пойтахти Куала-Лумпурда бўлиб ўтган АСЕАН тадбирлари якунлари бўйича ўтказилган матбуот анжуманида Лавровдан АҚШ давлат котиби Марко Рубио баёнотлари ҳақида фикр сўралди. У эса: «Бу борадаги гапларни шарҳламайман» деб жавоб қайтарди. Шу билан бирга, Трампнинг сўзларини келтирди: «Мен буни айта олмайман. Катта сюрпризлар кутинг».
Рубио аввалроқ АСЕАН саммити доирасида Москва ва Киев ўртасидаги «йўл харитаси» муҳокама қилинганини айтган эди. У Россия томони янги таклифлар билдирганини қайд этган, аммо тафсилотларни ошкор қилмаган.
Журналистлар Лавровдан мазкур ташаббус кимга тегишли экани ва қандай янгиликлар таклиф этилганини сўрадилар. Лавров фақат Украина масаласи муҳокама қилинганини тасдиқлади ва Москва ўз позициясини қайта баён этганини билдирди.
У Россия президенти Владимир Путиннинг 3 июл куни Доналд Трамп билан суҳбатида ҳам ана шу позиция такрорланганини эслатди. Кремл маълумотларига кўра, суҳбат давомида Путин сиёсий йўл билан муаммони ҳал қилиш тарафдори эканини айтган, аммо Россиянинг мақсадлари ўзгармаслигини таъкидлаган.
Айни вақтда Доналд Трамп шу ҳафтада Россия учун «сюрприз» тайёрлаётганини маълум қилган. У янги санкциялар ҳақидаги саволга жавоб бериб, ҳозирча қарор қабул қилинмаганини айтган ва 14 июл куни «муҳим баёнот» эълон қилинишини ваъда қилган.
Шу билан бирга, АҚШ Сенатида Линдси Грэҳэм томонидан таклиф этилган ташаббус — Россиянинг ҳамкорларига нисбатан 500 фоизгача бож ставкалари жорий этиш лойиҳаси муҳокамада турибди. Трамп таъкидлашича, якуний қарор унинг қўлида.
Сўнгги ҳафтанинг ўзида Трамп бир неча марта Россиянинг Украинадаги ҳаракатларидан норозилик билдирган ва Путин билан охирги мулоқотда ҳеч қандай олға силжиш қайд этилмаганини тан олган.