Рақобат қўмитаси матбуот хизматининг маълум қилишича, Фарғона вилоятида «Реклама тўғрисида»ги Қонун талабларига риоя этилиши юзасидан ўтказилган ўрганишлар давомида, лицензиясиз Умра рекламалари тарқатган Telegram каналлар аниқланган.
Жумладан, Фарғона шаҳрида яшовчи Абубакирсиддиқ Раҳматуллаевнинг «Умра Сафари 2025», Марғилон шаҳридаги Муҳаммадюсуф Одилжоновнинг «Саудияга Саёҳат Муҳаммадюсуф» ва Ёзёвон туманида яшовчи Абдулвоҳид Раҳимовга тегишли «Макка Мадина Саёҳат» номли каналларда тегишли лицензия ҳужжатлари мавжуд бўлмаган ҳолда саёҳат рекламалари жойлаштирилган.
Қонунбузарлик аломатлари бўйича мазкур шахсларга нисбатан иш қўзғатилиб, ҳужжатлар судга юборилган. Шунингдек, лицензиясиз фаолият юритаётган бошқа ахборот ресурсларини аниқлаш мақсадида Ички ишлар вазирлиги ва Киберхавфсизлик марказига мурожаат қилинган.
Маълумот учун, жорий йилда Умра тадбирларини ташкил этиш учун яна икки компанияга лицензия берилган бўлиб, умумий сони 14 тага етди. Май ойида тўртта лицензиясиз туроператорга нисбатан жарималар қўлланган. Шу билан бирга, Telegramда ноқонуний реклама қилган 11 та канал маъмури маъмурий жавобгарликка тортилган.