Bloomberg нашрининг ёзишича, West Texas Intermediate (WTI) нефтининг нархи 2,1 фоизга пасайиб, баррели 67 доллардан пастга тушди. Ушбу тушишга Трампнинг «50 кун ичида уруш тўхтамаса, Россия билан савдо қилувчи давлатларга 100 фоизлик божлар қўлланилади», деган таҳдиди сабаб бўлди. Бироқ у Россия нефти экспортига бевосита чекловлар ҳақида гапирмади, бу эса трейдерлар кутаётган асосий қадамлардан бири эди.
Rabobank компанияси энергетика бўйича мутахассиси Жо ДеЛаурага кўра, бундай «иккиламчи божлар»ни амалга ошириш осон эмас ва сармоядорлар бу ташаббусга ишонмаяпти. Унинг таъкидлашича, фақатгина Россия нефт саноатига бевосита АҚШ санкциялари қўлланилса, нефт нархи юқорилаши мумкин эди.
Bloomberg Трампнинг Европа Иттифоқи ва Мексика маҳсулотларига 30 фоизлик бож жорий этиш таҳдидлари туфайли ҳам энергия ресурсларига бўлган талаб бўйича истиқболлар бузилганини таъкидлайди. Бу ғарб давлатлари ва Хитой ўртасидаги савдо қарама-қаршилиги янада авж олишини англатади.
Шу билан бирга, OPEC+ мамлакатлари қазиб олиш чекловларини аста-секин юмшатмоқда. Бу иккинчи ярим йилликда нефт таклифининг ортиб кетишига олиб келиши мумкин. Шу сабабли, нефт нархи йил бошига нисбатан 6 фоиз арзонлашган ҳолда қолмоқда.
Инвесторлар ҳозирда АҚШда эълон қилиниши кутилаётган инфляция кўрсаткичларига диққат қаратмоқда. Бу кўрсаткичлар АҚШнинг пул-кредит сиёсати келажаги бўйича муҳим сигналларни бериши мумкин.