14 июл куни Савдо-саноат палатаси томонидан умумий овқатланиш ва савдо соҳаси вакиллари иштирокида ўтказилган очиқ мулоқотда мазкур масала кўтарилди. TESTO ҳаммуассисаси Наргиза Улуғова Меҳнат кодексининг 333-моддасига эътибор қаратди. Унга кўра, иш ҳақи кечиктирилса, иш берувчи ходимга Марказий банкнинг қайта молиялаштириш ставкасининг 10 фоизидан келиб чиқиб, кунлик 1,4 фоиз миқдорида компенсация тўлаши шарт.
Улуғованинг таъкидлашича, бу ҳолатда йиллик 14 фоизлик ставка кунлик ҳисобга кўчирилиши адолатсизлик бўлиб, бир ой кечикиш учун 42 фоиз компенсация тўланишига олиб келмоқда. Унинг фикрича, компенсация миқдорини йил кунларига бўлиб қайта ҳисоблаш мақсадга мувофиқ.
«Карбонат» АЖ раҳбари Фаррух Садиқхўжаев эса, компаниянинг табиий газ етишмовчилиги туфайли ойлаб ишлаб чиқариш тўхтаганини ва иш ҳақлари кечиктирилганини билдирди. Унинг таъкидлашича, ойлик 5 млн сўм бўлган ходимларга 50 млн сўм компенсация тўлаш мажбурияти юкланган. Компания 800 млн сўмлик маош жамғармасига эга бўлган ҳолда, 8 млрд сўмлик компенсация талаблари билан тўқнаш келган. Бу эса ишлаб чиқаришнинг тўлиқ тўхташи ва банкротлик хавфига олиб келган.
Мавжуд формула сабабли Жиззахдаги тўртта тўқимачилик корхонаси ҳам шундай муаммога дуч келгани айтилди. Садиқхўжаев қонунни қўллашда суд ва давлат идоралари фақат бир талқинга таянаётганини танқид қилди, деб ёзмоқда Spot.uz нашри.
Савдо-саноат палатаси раиси Даврон Ваҳобов меҳнат кодексидаги бу модда бизнес учун оғир оқибатларга олиб келаётганини таъкидлаб, тегишли вазирлик билан очиқ муҳокама ўтказиш кераклигини билдирди.
Савдо ва хизмат кўрсатиш ассоциацияси раиси Зафар Ҳошимов эса моддани ноадекват деб атаб, иш берувчи ва ишчи манфаатлари ўртасида номутаносиблик келтириб чиқараётганини қайд этди. У бу борада парламент ва ишчи гуруҳлар билан фаол ҳамкорлик қилишни таклиф қилди.