АҚШ Қуролли кучлари ва NORAD раҳбари, генерал Грегори Гийо Сенатдаги эшитувларда сўзга чиқиб, Украинадаги уруш тўртинчи йилга киргани ва вазият кескинлашган тақдирда АҚШ ҳамда Россия ўртасида тўғридан тўғри ҳарбий тўқнашув эҳтимоли ортаётганини маълум қилди. Унинг таъкидлашича, Россия, Хитой, Шимолий Корея ва Эрон биргаликда АҚШ билан очиқ тўқнашувдан қочишга интилаётган бўлса-да, Ғарб заифлашаяпти деган қараш уларни фаоллаштирмоқда.
Гийо айни пайтда Россия ва Хитойнинг Арктикада ўтказаётган қўшма машғулотлари ва шимолий кореялик ҳарбийларнинг Курскдаги жангларда иштирок этишини ҳам хавотирли аломат сифатида тилга олди. Унинг сўзларига кўра, Яқин Шарқдаги вазият АҚШни Эрон ва унинг прокси гуруҳлари билан тўқнашувга олиб келиши мумкин. Тайван ва Жанубий Хитой денгизи атрофидаги муаммолар эса Хитой билан ҳарбий муаммоларга олиб бориши эҳтимоли бор.
АҚШ вице-президенти Жей Ди Вэнс эса апрел ойидаги баёнотида Украинадаги уруш яна бир неча йилга чўзилса, ядровий қурол ишлатилиши мумкинлигини айтган. У Ғарбда уруш Россия мағлубияти ва Украина ғалабаси билан якунланади деган қараш ҳукм сураётгани, лекин бу воқеликка тўғри келмаслигини қайд этган.
Россия Хавфсизлик кенгаши котиби Сергей Шойгу эса НАТО ҳарбийлари Украинанинг «Россиянинг тарихий ҳудудлари»га кирса, бу учинчи жаҳон урушига олиб келиши мумкинлигини айтган.