AFP маълумотига кўра, ушбу чоралар расман 20 май куни тасдиқланади. Санкциялар асосан Кремлнинг «хуфёна флоти»га ва Москвага энергетикага оид чекловларни четлаб ўтишда кўмаклашган компания ва шахсларга қаратилган. Жумладан, Европа портларида хизмат кўрсатиши тақиқланган танкерлар сонига яна 98 та қўшилди. Энди «қора рўйхат»даги умумий танкерлар сони 250 тани ташкил этади.
Еврокомиссия ҳужжатларига кўра, ушбу танкерлар AIS-транспондерларини ўчириб, суғурта ёки молиявий кафолатларсиз хавфли юк ташиш амалиётларини амалга оширган. Санкциялар Россия мудофаа саноати билан боғлиқ жисмоний ва юридик шахсларни ҳам қамраб олади.
Экспорт чекловлари 35 та компанияга, жумладан Қозоғистон, Ўзбекистон, Сербия ва Туркияда жойлашган фирмаларга ҳам қўлланилади. Маълум қилинишича, Венгрия ҳали ҳам Россия нефт импортини давом эттираётгани сабабли Дубайдаги Litasco компаниясини рўйхатдан чиқаришни сўраган. Аммо Евроиттифоқ ушбу компанияни Кремлга танкер сотиб олишда ёрдам берган деб ҳисобламоқда.
Шу билан бирга, Евроиттифоқ биринчи бор Россияни Украинада кимёвий қурол ишлатганликда айблади. Бу асосда Россиянинг радиация, кимё ва биологик ҳимоя қўшинлари ҳам санкцияларга учради. Шунингдек, Алексей Навалний иши бўйича масъул 28 нафар судя ва прокурорга, интернетда аксилуруш постлар ёзган фуқароларга ҳукм чиқарганлари учун жазо тайинланди.
Евроиттифоқ 20 дан ортиқ фуқаро ва компанияни бутун дунё бўйлаб беқарорлаштируви ҳаракатлари учун санкция рўйхатига киритади. Улар орасида Эстония ички ишлар вазирига ҳужум уюштирганлар, Германияда Россия тарафдори сифатида аксил демократик кучлар билан ҳамкорлик қилган шахслар ва дезинформация тарқатган блогерлар бор.