Украиналиклар Трампнинг ҳарбий ёрдам бериш борасидаги кутилмаган баёнотидан кейин ижтимоий тармоқларда Мелания Трампга оммавий равишда миннатдорчилик билдирмоқда. Доналд Трамп Оқ уйда НАТО бош котиби Марк Рютте билан учрашувда Россия президенти Владимир Путиннинг хатти-ҳаракатларига нисбатан муносабати айнан рафиқаси туфайли ўзгарганини баён қилди.
АҚШ раҳбари Россия ва Украина можароси бўйича позицияси нейтрал эканлигини, у томонларнинг ҳеч бирини қўллаб-қувватламаслигини таъкидлади. Унинг ўзи шунга ўхшаш саволга жавобан Москва ва Киев ўртасидаги урушда «инсоният томонида» эканини ва қон тўкилишига имкон қадар тезроқ чек қўйишни исташини таъкидлади.
Мелания Трамп Доналд Трампнинг баёнотларига ҳали ҳеч қандай изоҳ бермаган. У одатда сиёсий қарашларини оммага ошкор қилмайди. Independent нашрининг ёзишича, шунга қарамай, у Украина президенти Володимир Зеленскийнинг Оқ уйдаги муҳим иттифоқчиларидан бири сифатида тилга олинади.
«Бегуноҳ одамларнинг азоб чекаётгани юракни эзади ва даҳшатга солади. Украина халқини ўйлайман ва улар учун дуо қиламан. Илтимос, имконингиз бўлса, уларга ёрдам беришга маблағ ажратинг», деб ёзди Мелания Трамп Х даги саҳифасида.
Доналд Трамп Меланиянинг Путинга нисбатан муносабати ва унинг фикрларига қандай таъсир қилгани ҳақида гапирганидан сўнг, Украина ижтимоий тармоқларида ҳазил-мемлар кўпайди. Кўпчилик собиқ биринчи хонимни «агент Мелания Трампенко» деб атай бошлади ва уни Киевнинг Оқ уй ичидаги яширин иттифоқчиси сифатида тасвирлади. Энг машҳур мемлардан бири — Украина рангларидаги қатъий бичимли пижак ва кенг соябонли шляпа кийган Мелания образидир, у унда худди махфий жосус каби кўрсатилган.
Мелания Трамп ўзи ким?
Мелания Трамп — АҚШнинг биринчи хоними, Доналд Трампнинг рафиқаси ва жамоатчиликда сокин, аммо ўзига хос таъсирга эга шахс сифатида танилган. У 1970 йилда собиқ Югославия ҳудудидаги Словения давлатида туғилган. Асли исми Мелания Кнавс бўлиб, кейинчалик модел сифатида халқаро миқёсда фаолият юритган. 1990 йилларда АҚШга кўчиб ўтган ва 2006 йилда АҚШ фуқаролигини олган. У 2005 йилда Доналд Трамп билан турмуш қурган ва бу никоҳдан Беррон Трамп исмли ўғли бор. Мелания АҚШ тарихида хорижда туғилган кам сонли биринчи хонимлардан бири саналади.
Мелания Трамп сиёсий майдонда фаол сиёсатчи сифатида эмас, балки ўзининг хотиржам, лекин сезиларли таъсири билан ажралиб туради. У кўп интервюлар бермайди, оммавий сиёсий чиқишлардан қочади, бироқ Трампнинг позицияларига таъсир ўтказадиган энг яқин маслаҳатчиларидан бири сифатида тилга олинади.
Яқинда Доналд Трамп Россия президенти Владимир Путин билан суҳбатдан сўнг айнан Меланиянинг мулоҳазалари унинг фикрини ўзгартирганини тан олди. Трамп айтишича, у Путин билан «яхши мулоқот» ўтказганини айтганида, Мелания унга «худди шу дақиқаларда Украинада яна бир шаҳар бомбардимон қилинди», деб жавоб берган.
Бу ҳолат Меланиянинг сиёсий воқеаларга бефарқ эмаслигини, балки Трамп қарорларига ахлоқий ва ҳиссий таъсир кўрсата олишини кўрсатади.
Меланиянинг сиёсий таъсири нимада?
Меланиянинг сиёсий таъсири бевосита қонунчилик ёки ташаббус орқали эмас, балки унинг шахсий муносабатлари, хусусан Трампга бўлган яқинлиги орқали амалга ошади. У расмий сиёсий лавозимда ишламаган бўлса-да, унинг позицияси айниқса ташқи сиёсатга оид масалаларда, хусусан Европа билан алоқаларда муҳим бўлиб келган.
У ўзининг европалик илдизларини сақлаб қолган — ўғли билан словен тилида гаплашади, Европага тез-тез бориб туради, Европа Иттифоқи паспортига эга ва айнан шу орқали Ғарб сиёсий муҳитини ичидан тушунади. Бу эса уни АҚШнинг ички сиёсий муҳитида Европа билан кўприк вазифасини ўтайдиган ноёб шахслардан бирига айлантиради.
Умуман олганда, Мелания Трамп ўзининг камгаплиги, аммо сиёсий воқеаларга бевосита таъсир кўрсата олиши, халқаро масалалардаги сезгирлиги ва Трампнинг энг яқин маслаҳатдошларидан бири сифатида сиёсатдаги ўзига хос кучга эга. У саҳна ортида, лекин муҳим бурилишларда рол ўйнайдиган «сокин куч» сифатида замонавий АҚШ сиёсатида алоҳида ўрин эгаллайди.
Меҳриноза Фармонова тайёрлади.