Fox News маълумотига кўра, ушбу тадқиқотчилар АҚШ озиқ-овқат хавфсизлигини таъминлаш юзасидан ўтказилган текширувлардан сўнг ишдан бўшатилган. Улар шартнома асосида Қишлоқ хўжалиги вазирлиги (USDA) таркибидаги лойиҳаларда ишлаб келган, эндиликда эса бу дастурларда иштирок этиш ҳуқуқини йўқотган.
Ишдан бўшатилганларнинг катта қисми хитойлик олимлар бўлиб, улар USDA’нинг Қишлоқ хўжалиги тадқиқот хизмати (ARS) доирасидаги постдокторлик дастурида фаолият юритган. Reuters хабарига кўра, улар 9 июл куни ишга келган пайтда шахсий рухсатномаларининг бекор қилинганини билиб қолган.
Мазкур қарор АҚШда хорижлик мутахассисларнинг илм-фан ва қишлоқ хўжалиги соҳаларидаги иштирокига чекловлар киритилаётган пайтда қабул қилинди. Шу ой бошида вазир Брук Роллинз АҚШда душман давлатлардан келган шахслар томонидан ер сотиб олишини чеклаш ва хорижий ишчилар сонини камайтириш режалари ҳақида маълум қилган эди.
Reuters маълумотига кўра, Трамп маъмурияти қайтиб келганидан сўнг вазирликда 2024 йилга нисбатан 17 фоиздан зиёд қисқартиришлар амалга оширилган ва 1 200 дан зиёд ходим ишдан бўшатилган.