Россия ҳукумати махсус сигналлар билан ҳаракатланаётган транспорт воситаларини ўтказиб юбормасликка қарши қаттиқ чораларни жорий этмоқда. Бош вазир Михаил Мишустин махсус автоуловларнинг ҳаракатини таъминлашга оид янги қарорни имзолади. Унга кўра, ҳайдовчилар мажбурий равишда йўл беришлари ёки йўлни тўлиқ бўшатишлари шарт.
Ушбу қарор «тез ёрдам», полиция, Мудофаа вазирлиги, ФВВ каби хизматлардан ташқари, амалдорларни ташувчи автомобилларга ҳам тааллуқли бўлади. Йўлни бўшатмаслик — энди фақат ЙҲҚ бузилиши эмас, балки маъмурий жавобгарлик ҳам ҳисобланади.
Давлат Думаси эса шунга мувофиқ равишда МЖтКга ўзгартириш киритди. Янги қоидаларга кўра, махсус сигнал билан юрган машинани ўтказмаслик 6 ойдан 1 йилгача ҳайдовчилик гувоҳномасидан маҳрум қилишга сабаб бўлади. Жарималар эса 7,5 мингдан 10 минг рублгача етиши мумкин.
Аввалги қоидаларда ҳайдовчи йўлни қай тарзда бўшатиши кераклиги аниқ белгиланмаганди. Янги қонун лойиҳасини Думадаги хавфсизлик қўмитаси раиси Василий Пискарёв таклиф этган. Унинг таъкидлашича, айниқса Давлат хавфсизлик хизмати (ФСО) муҳофазасидаги шахслар учун транспорт воситаларининг ҳаракатини таъминлашда қийинчиликлар кўпайган.
Пискарёвнинг ташаббуси Ички ишлар вазирлиги, ФСО, Транспорт, Молия ва Адлия вазирликлари томонидан қўллаб-қувватланган. Янги тартиб билан амалдорлар ёки хизмат машиналари иштирокидаги ҳар қандай махсус автотранспортга ҳурматсиз муносабат жазога сабаб бўлади.