Жаҳон олтин кенгаши ҳисоботига кўра, 2025 йилнинг биринчи ярмида олтин АҚШ доллари ҳисобида 26 фоизга ошди ва барча асосий валюталарда юқори даромад қайд этилди. Бундай ўсишга заифлашган доллар, фоиз ставкаларининг чекланганлиги ва геоиқтисодий ноаниқликлар сабаб бўлди.
Кенгаш экспертлари иккинчи ярим йилликда олтин нархи қандай ўзгариши мумкинлиги борасида бир неча таҳминларни тақдим этди. Бозордаги кутилмаларга кўра, агар иқтисодий шароитлар жорий ҳолатда қолса, олтин яна 0–5 фоизгача ўсиши мумкин. Бу ҳолат фоиз ставкалари 50 базавий пунктга пасайиши билан боғлиқ.
Агар иқтисодий вазият ёмонлашиб, стагфляция ва геосиёсий кескинликлар кучайса, хавфсиз актив сифатида олтинга талаб ортади ва нарх 10–15 фоизгача ошиб кетиши эҳтимоли бор. Бошқа томондан, агар глобал можаролар ҳал бўлиб, бозор барқарорлашса — бу эҳтимоли кам ҳолат ҳисобланади — унда олтин йил бошидаги ўсишининг 12–17 фоизини йўқотиши мумкин.
WGC таҳлилида олтин нархига таъсир қилувчи омиллар тўрт гуруҳга ажратилган:
иқтисодий ўсиш
хавф ва ноаниқлик
имконият харажати
бозор инерцияси.
Бу омиллар олтинни ҳам истеъмол маҳсулоти, ҳам инвестиция активи сифатида шакллантиради.
АҚШ долларининг заиф бошланиши, Федерал резерв сиёсатидаги ўзгаришлар ва геосиёсий хавфлар фонида кўплаб инвесторлар олтинни узоқ муддатли ишончли актив сифатида кўрмоқда.