«Apple» янги «Siri»ни сунъий интеллект билан алоҳида илова сифатида чиқаради – «Bloomberg»

«Bloomberg» маълумотига кўра, «Apple» сунъий интеллект билан янгиланган «Siri»ни катта миқёсда модернизация қилгандан сўнг алоҳида илова сифатида чиқаради. Шунингдек, компания «Ask Siri» деб номланадиган янги функцияни қўшишни режалаштирмоқда, у орқали ассистентга тўғридан тўғри тизим иловалари ичидан мурожаат қилиш мумкин бўлади. Янги имкониятлар июн ойида намойиш этилиши кутилмоқда. Таҳлилчилар бу сунъий интеллект янгилигини компания акциялари ўсиши учун эҳтимолий катализатор деб баҳоламоқда, чунки ҳозирда «Apple» бу йўналишда рақобатчилардан ортда қолмоқда.

«Siri» учун янги интерфейс

«Apple» янги моделга ўтиш доирасида «iPhone», «iPad» ва «Mac» учун алоҳида «Siri» иловасини синаб кўрмоқда. Унинг ишга туширилиши жорий йилнинг кейинроқ даврига режалаштирилган. Илова ташқи СИ-хизматларига рақобат қилади ва фойдаланувчининг ўзаро алоқалар тарихи учун ягона марказ вазифасини бажаради», деб ёзади «Bloomberg» манбаларига таяниб.

«Ask Siri» функцияси компания экотизими бўйлаб ишлайди. Масалан, фойдаланувчи матндаги маълумотни ажратиб олиб қўшимча тушунтириш сўраши ёки боғлиқ электрон хатларни очиши мумкин бўлади. Бу функция механизми жиҳатидан «iPhone»даги «ChatGPT» иловасига ўхшаш бўлади.

Шу билан бирга, «Apple» «Siri» учун чат-ботга ўхшаш янги интерфейс яратмоқда. Асосий ўзгариш – фойдаланувчи билан матн ва овоз орқали диалог шаклида мулоқот қилиш имконияти. Бу ҳозирги «Siri»дан жиддий фарқ қилади, чунки у тўлиқ суҳбатни қўллаб-қувватламайди.

«Apple», шунингдек, «Spotlight» қидирув тизимини «Siri» билан алмаштириш устида ишламоқда. Янги бирлашган интерфейс орқали фойдаланувчи бир жойда маҳаллий контентни қидириши ва кенгроқ сўровлар бериши мумкин бўлади.

Янгиланган «Siri» интернетдан янада тўлиқ жавоблар, масалан, қисқача хулосалар, рўйхатлар ва расмлар билан тақдим этади. Бу «Apple»га «Google Gemini» ва «Perplexity» каби AI-қидирув хизматлари билан рақобат қилиш имконини беради. Шунингдек, у «Apple News» асосида кунлик янгиликлар шарҳини ҳам тайёрлаб бера олади.

Янги версия 8 июн куни «WWDC» конференциясида, «iOS 27» ва «macOS 27» билан бирга намойиш этилиши кутилмоқда. Лойиҳа ҳали ишлаб чиқиш босқичида. Илгарироқ ваъда қилинган баъзи функциялар, масалан, шахсий маълумотларга кириш ва экран контекстини тушуниш кузгача тайёр бўлмаслиги мумкин.

«Apple» янги ўсиш омилларини изламоқда

«Bernstein» феврал ойида овозли ёрдамчи «Siri 2.0»нинг дебютини 2026-йилда компания акциялари учун «iPhone» сотувлари ёки хотира чиплари нархларининг ўсишидан ҳам муҳимроқ драйвер бўлиши мумкинлигини таъкидлаган.

«Улар икки йил кеч қолишди. Бу йил улар албатта нимадир кўрсатиши керак», – деган ўшанда таҳлилчи Марк Нюман.

Жаҳон смартфон бозорининг пасайиши ва хотира компонентлари нархининг ўсиши фонида «Apple» янги ўсиш омилларини изламоқда, деб ёзади «MarketWatch». «Morgan Stanley» ва «Bank of America» таҳлилчилари март ойида бу омиллардан бири сифатида компания жорий йилда тақдим этиши кутилган биринчи букланадиган «iPhone»ни ҳам кўрсатган.

«Morgan Stanley» баҳоларига кўра, «Apple» букланадиган қурилмалар орқали 18 ой ичида 40–60 миллиард доллар даромад олиши мумкин ва ушбу бозор 2027-йилгача икки баробар ўсиши кутилмоқда. Хотира чиплари нархи босимига қарамай, талаб юқори қолмоқда: «AlphaWise» сўровига кўра, дунё бўйлаб «iPhone» фойдаланувчиларининг 27 фоизи ва Хитойда 40 фоизи букланадиган моделларга «жуда қизиқади».

Акциялар ҳолати

«Apple» акциялари 25-март премаркетда 0,8 фоизга ошган. 2026-йил бошидан бери эса улар 7 фоизга тушган.

Шунга қарамай, компанияни кузатувчи таҳлилчиларнинг аксарияти акцияларни сотиб олишни тавсия қилмоқда:

35 та «Buy / Overweight» рейтинг

15 та «Hold» («ушлаб туриш»)

2 та «Sell» («сотиш»)

Таҳлилчиларнинг ўртача мақсадли нархи – 298,8 доллар бўлиб, бу охирги ёпилиш нархидан 19 фоизга юқори ҳисобланади.