Диёр Имомхўжаев яна Ўзбекистон Профессионал футбол лигаси раҳбари этиб сайланди

Диёр Имомхўжаев навбатдаги тўрт йиллик муддатга Ўзбекистон Профессионал футбол лигаси (Лига) бош директори лавозимига бир овоздан тасдиқланди. Бу ҳақда 19 август куни бўлиб ўтган Лига Ижроия қўмитаси йиғилиши якунлари бўйича маълум қилинди.

Ташкилотнинг амалдаги раҳбари 2026 йилнинг 19 август санасидан эътиборан кейинги тўрт йил давомида ўз вазифасини бажаришда давом этадиган бўлди.

Номзоднинг илгари сурилиши

Бундан аввалроқ, 17 август куни Ассоциация президенти Баҳодир Қурбонов томонидан имзоланган тақдимнома Лига Ижроия қўмитасига юборилган эди. Ушбу ҳужжатда Лига бош директори лавозими учун айнан Диёр Имомхўжаев номзоди илгари сурилгани хабар қилинганди.

19 август куни Лига Ижроия қўмитасининг жами 8 нафар аъзоси мазкур масалани кўриб чиқиш учун йиғилди.

Йиғилишда қўмитанинг барча аъзолари тўлиқ иштирок этган. Жумладан, улар орасидан Одил Аҳмедов ҳамда Алишер Юсупов Куала-Лумпур шаҳридан, шунингдек, Элбек Саматов Андижондан туриб, яъни масофадан онлайн тарзда Лига бош директорлиги учун ўз овозларини тақдим этишгани маълум қилинди.

«Йиғилиш якунига кўра, Ижроия қўмитанинг барча аъзоси бир овоздан Диёр Имомхўжаев номзодини навбатдаги ваколат муддатига бош директор сифатида тасдиқлади», — дейилади расмий хабарда.

Эслатиб ўтамиз, Диёр Имомхўжаев 2020 йилдан эътиборан лига бош директори вазифасини бажарувчиси, 2022 йилдан эса бош директори сифатида ишлаб келмоқда.