Дунёнинг яшаш учун энг қулай 10 шаҳри маълум қилинди
Кучли ўнликка асосан Европа шаҳарлари, шунингдек, Осиё ва Австралия мегаполислари киритилган.
Токио дунёнинг энг яшаш қулай бўлган шаҳарлари рейтингида биринчи ўринни эгаллади. Бу ҳақда «Monocle» журналининг 2026 йилги ҳаёт сифати сўровномасида (Quality of Life Survey 2026) маълум қилинди.
Ушбу рўйхатда иккинчи ўринни Копенгаген, учинчи ўринни эса Лиссабон банд этди. Нашр томонидан тузилган кучли ўнликка, шунингдек, Вена (4-ўрин), Сидней (5-ўрин), Цюрих (6-ўрин), Мадрид (7-ўрин), Париж (8-ўрин), Мюнхен (9-ўрин) ва Осло (10-ўрин) шаҳарлари киритилди.
Сўровнома дунёнинг 40 та шаҳридаги мухбирларга юборилган 30 та савол асосида тузилган бўлиб, унда хавфсизлик, транспорт тизими, бошқарув, яшил ҳудудлар, шаҳарсозлик амбициялари ҳамда соат 22:00 дан кейин овқатланиш имкониятлари каби мезонлар баҳоланди.
Баҳолаш жараёнида «Knight Frank» кўчмас мулк мутахассислари ҳамда «EIT Edition»нинг 2025 йилги велосипед транспорти улушини ўлчайдиган «Copenhagenize» индекси маълумотларидан кенг фойдаланилганлиги билдирилди.
Европанинг етакчилиги ва минтақавий кўрсаткичлар
Токионинг етакчилигига унинг барқарорлиги, паст жиноятчилик даражаси, 2,5 триллион долларлик ЯИМ кўрсаткичи ва жамоат транспортидаги тартиб сабаб қилиб кўрсатилди.
Копенгаген ўзининг узлуксиз метро тизими, велосипед инфратузилмаси ва коммунал яшаш тарзи билан ажралиб турган бўлса, Лиссабон жамоат транспортига киритилган изчил сармоялар, электр велосипедлар тармоғи ҳамда тарихий дўконларини сақлаб қолганлиги билан юқори ўринни эгаллади.
Тенгсизлик, уй-жой муаммолари ва жиноятчиликнинг юқори даражаси сабабли
Шимолий Америкадан фақатгина Ванкувер (19-ўрин) топ-20 ликка кира олди. Лондон ва Лос-Анжелес каби йирик мегаполислар ушбу рўйхатга умуман киритилмади. Шунингдек, Африка ва Яқин Шарқ шаҳарлари маъмурий амбицияларга эга бўлишига қарамай, Европа ва Осиё бозорларига нисбатан хавфсизлик даражаси етарли эмаслиги сабабли рейтингдан жой олмаганлиги маълум қилинди.
Рейтингнинг кейинги ўринлари Стокгольм (11), Милан (12), Барселона (13), Сингапур (14), Амстердам (15), Хельсинки (16), Сеул (17) ва Мельбурн (18) шаҳарларига тақсимланди. Йигирманчи ўринни эса Австралиянинг Перт ва Япониянинг Киото шаҳарлари ўзаро бўлишиб олди.
