Энди 1 кунда фақат 1 та банкдан онлайн кредит олиш мумкин

22 апрелдан бошлаб фуқаролар бир кунда фақат битта банк орқали онлайн кредит расмийлаштириши мумкин бўлади. Бу ҳақда Марказий банк Бошқарувининг 2026 йил 21 январда Адлия вазирлигидан 3759-рақам билан рўйхатдан ўтган янги Низомида келтирилган.

Низомга кўра, онлайн кредит олиш учун ариза берилганда, кредит ташкилоти аввало мижоз маълумотларини кредит битимини тузиш тақиқланган шахслар реестри орқали текширади.

Агар фойдаланувчи маълумотлари мазкур реестрда аниқланмаса, кредит бериш жараёни одатий тартибда давом эттирилади. Бу эса тизимнинг шаффофлиги ва хавфсизлигини таъминлашга хизмат қилади.

Шу билан бирга, бир ЖШШИР бўйича бир вақтнинг ўзида бир нечта кредит ташкилотларига ариза юборилса, кредит бюроси фақат биринчи келиб тушган сўровни кўриб чиқади. Қолган сўровлар эътиборга олинмайди.

Агар биринчи бўлиб мурожаат қилган банк кредит расмийлаштирилганини тасдиқласа, кредит бюролари ушбу ЖШШИР бўйича бошқа кредит ташкилотларига 24 соат давомида янги сўровлар қабул қилинмаслиги ҳақида хабар беради.

Эслатиб ўтамиз, аввалроқ айнан шу низом билан 22 апрелдан мобил иловалар ёки банк карталарига бириктирилган телефон рақами ўзингизга тегишли бўлмаса, белгиланган муддатдан кейин ушбу рақам орқали иловадан фойдаланиш имкони чекланиши ҳақида хабар берган эдик.