Фермер сунъий интеллект тавсиясига амал қилиб, 10 гектар экинидан айрилди

Хитойлик фермер сунъий интеллектнинг нотўғри маслаҳатига ишониб, 10 гектар кунжутдан айрилди. Бу ҳақда NDTV хабар берди.

Хитой шарқидаги Анхой провинциясининг Чучжоу округида яшовчи 67 ёшли фермер Ву бир йил аввал сунъий интеллектдан маслаҳат ола бошлаган. Бир неча ой давомида ундан фойдаланганидан сўнг, СИ унга жуда нотўғри маслаҳат берган ва бу фермернинг 10 гектар кунжут ҳосили нобуд бўлишига олиб келган.

Тайваннинг «Ctwant» компанияси маълумотларига кўра, Ву дастлаб сунъий интеллект маслаҳатларига унчалик ишонмаган. Бироқ баъзи тавсиялари самарали бўлиб кўрингач, унга ишона бошлаган.

Кейинчалик фермер кунжут етиштиришда бегона ўтлар ва зараркунандаларга қарши курашиш бўйича СИдан маслаҳат сўраган. Сунъий интеллект унга бир нечта кимёвий воситаларни аралаштириб, экинларга сепишни тавсия қилган. Ву СИ тавсиясига тўлиқ амал қилган. У маълумотни агрономлардан текширмаган ва бошқа интернет манбалари билан ҳам солиштирмаган. Натижа эса тезда маълум бўлган: эртаси куни нафақат бегона ўтлар, балки кунжут ниҳоллари ҳам оммавий равишда нобуд бўлган.

Вунинг айтишича, ушбу аралашма билан сепилганидан кейин ниҳоллар бир кун ҳам яшаб қолмаган. Фермер нима сабабдан бундай бўлганини СИдан сўраганида, чат-бот эҳтимолий сабаблардан бири сифатида кимёвий воситалардан бирини кўрсатган.

Қишлоқ хўжалиги мутахассислари эса ушбу восита асосан соя майдонларидаги кенг баргли бегона ўтларга қарши қўлланилишини айтган. Шунингдек, уни бутун майдонга эмас, балки муаммоли жойларга маҳаллий тарзда сепиш керак.

Фермернинг таъкидлашича, сунъий интеллект унга тавсияни қўллаш билан боғлиқ эҳтимолий хавфлар ҳақида огоҳлантирмаган. Бироқ СИ чат-боти саҳифасида нейротармоқ томонидан яратилган жавоблар нотўғри бўлиши мумкинлиги ва уларни текшириш кераклиги ҳақида огоҳлантириш мавжуд бўлган.