«Nvidia»dan 40 yillik tarixni o‘zgartiruvchi kashfiyot: Komputeringiz endi sizni ko‘radi va tushunadi

Shu yilning oxirlarida «Nvidia» «Windows» va «Dell» kabi brendlar bilan hamkorlikda sun’iy intellekt imkoniyatlarini bevosita komputerlarga integratsiya qilishga hozirlik ko‘rmoqda. Bu orqali AQSH texnologiya giganti SI (sun’iy intellekt) bozoridagi o‘z o‘rnini yanada mustahkamlamoqchi.

Kaliforniyaning Santa-Klara shahrida joylashgan va sun’iy intellekt chiplari ishlab chiqarishga ixtisoslashgan mazkur kompaniya 1-may kuni Taypeyda bo‘lib o‘tgan «Nvidia GTC» yillik tadbirida yangi mahsulotini taqdim etdi. Ushbu kuchli chiplar noutbuk va shaxsiy komputerlarni ilg‘or SI funksiyalari bilan ta’minlaydi.

Kompaniya bosh direktori Jensen Xuang ushbu yangi ishlanmani «shaxsiy komputerlar olamining qayta kashf etilishi» deb baholadi.

Bu yangilik «Windows» va «Nvidia» o‘rtasidagi uch yillik hamkorlik mahsuli bo‘lib, «Nvidia»ning Advanced Micro Devices (AMD) kabi chip ishlab chiqaruvchilar, shuningdek, «Intel» va «Apple» singari komputer brendlariga qarshi raqobatda mavqeyini kuchaytiradi.

«Bu yangi avlod shaxsiy komputeri bo‘ladi», — dedi Xuang kompaniya tomonidan «sun’iy intellektli komputerlar» deb atalayotgan va shu yilning kuzida sotuvga chiqishi kutilayotgan yangi qurilmalarni harakatga keltiruvchi «Nvidia RTX Spark» superchipini tanishtirar ekan. Mazkur superchip markaziy protsessor (CPU) va grafik protsessor (GPU) imkoniyatlarini o‘z ichida birlashtiradi.

Tayvanning «MediaTek» kompaniyasi bilan hamkorlikda ishlab chiqilgan ushbu chip «Dell», «HP», «Lenovo», «ASUS», «Windows Surface» va «MSI» kabi brendlarning ixcham komputerlaridan joy oladi. Keyinchalik bu safga «Acer» va «GIGABYTE» modellari ham qo‘shilishi rejalashtirilgan.

Dunyoning eng qimmat kompaniyasi hisoblangan «Nvidia» ushbu yangilanish kontent yaratish va geyming sohasida katta burilish yasashini ma’lum qildi.

«Agar uning sizga yordam beradigan va sizni tushunadigan mustaqil [sun’iy intellekt] agenti bo‘lsa, u bilan gaplasha olasiz. U sizni ko‘ra oladi. Undan fayllarni o‘qib berishni yoki biror tadqiqotda ko‘maklashishni so‘rashingiz mumkin. U juda ko‘p narsaga qodir bo‘ladi», — deya ta’kidladi Xuang.

«Windows» o‘z bayonotida qayd etishicha, «Nvidia RTX Spark» superchiplarida ishlaydigan komputerlar «yuqori imkoniyatli sun’iy intellekt modellari»ni va murakkab vazifalarni qiyinchiliksiz eplaydi. Yangi superchiplar yordamida qurilmalar SI agentlarini bulutli serverlarda emas, to‘g‘ridan-to‘g‘ri o‘z ichida (lokal tarzda) ishga tushirishi mumkin.

«Bu shaxsiy komputerlarning 40 yillik tarixidagi birinchi global evolyutsiyadir», — dedi Xuang.

«Omdia» texnologiya tadqiqotlari va konsalting guruhi bosh tahlilchisi Lian Je Suning fikricha, shaxsiy SI agentlariga talab ortib borayotgan bir paytda «Nvidia»ning bu qadami juda muhim ahamiyatga ega.

«Iste’molchilar uchun bu kengroq tanlov degani, bu esa doimo yaxshi», — deydi Su.

«Counterpoint Research» firmasi tahlilchisi Nil Shoh «Nvidia»ning ushbu bayonotini «yaqin 10 yil ichida komputerlar qiyofasini tubdan o‘zgartiradigan» inqilobiy qadam deb atadi. Shohning so‘zlariga ko‘ra, bu qurilmalar har bir xonadonda SI ilovalaridan foydalanish ko‘lamini kengaytiradi. Bundan asosiy maqsad — har bir uyni «sun’iy intellekt superkompyuteri» bilan ta’minlash.

Dushanba kungi nutqida Xuang ma’lumotlar markazlari uchun mo‘ljallangan yangi «Vera» markaziy protsessorlari (CPU) ommaviy ishlab chiqarishga topshirilganini e’lon qildi. Uning aytishicha, SI agentlarining ommalashuvi fonida bu mahsulot kompaniyaning asosiy daromad manbalaridan biriga aylanadi. Ilk mijozlar qatoridan «Anthropic», «OpenAI» va «SpaceXAI» o‘rin olgan.

Shuningdek, Xuang kelajakdagi tadqiqotlar, xususan, oliy ta’lim sohasi uchun tayanch bo‘lib xizmat qiluvchi gumanoid (odamsimon) robot loyihasini ham taqdim etdi. «Isaac GR00T» deb nomlangan ushbu robotning bo‘yi qariyb 1,83 metr bo‘lib, u Xitoyning «Unitree» kompaniyasi tomonidan yaratilgan «H2» shassisiga asoslangan. Robot Singapurning «Sharpa» startapi ishlab chiqqan, harakatlarni o‘ta aniqlikda bajaruvchi besh barmoqli chaqqon qo‘llar bilan jihozlangan.

Hozirgacha SI komputerlariga bo‘lgan munosabat turlicha ekanligini kuzatish mumkin. Masalan, «HP» ushbu qurilmalar choraklik savdo hajmini oshirishga yordam berganini aytsa, «Dell» yil boshida talab kutilganidan pastroq bo‘lganini bildirgan. Bozordagi talabdan foydalanib qolish ilinjida yurgan «Qualcomm» ham «Windows» bilan hamkorlikda o‘zining SI komputerlarini taklif qilmoqda.

Shaxsiy ma’lumotlar daxlsizligi bo‘yicha xavotirlar

Bu jarayonda «Windows»ning ishtiroki maxfiylik va iste’molchilar talabi borasida ayrim xavotirlarni yuzaga keltirdi. Eslatib o‘tamiz, «Windows» 2014 yilda «Cortana» raqamli yordamchisini taqdim etgan, biroq u unchalik ommalashmagan edi. Dasturga bo‘lgan ishonchning yo‘qolishiga asosan maxfiylik bilan bog‘liq muammolar sabab bo‘lgan.

2019 yilda «Motherboard» nashri «Windows» «Xbox» va «Skype» orqali olingan foydalanuvchi ma’lumotlarini tinglash uchun pudratchilarni yollagani haqida xabar tarqatgandi. Oqibatda mahsulot 2023 yilda butunlay yopilib, uning o‘rnini «Copilot» SI tizimi egalladi (garchi u ham iste’molchilar orasida yetarlicha ommalasha olmagan bo‘lsa-da).

Joriy yilning mart oyida kompaniya 2008 yilgi moliyaviy inqirozdan keyingi eng yomon choraklik ko‘rsatkichini qayd etdi.

«Nvidia» va «Windows» yangi SI agentlari «Cortana» bilan solishtirganda foydalanuvchilarga ko‘proq manzur bo‘lishiga umid qilmoqda. Texnik ta’minot tayyor, biroq asosiy savol shundaki: «Windows foydalanuvchilari «Microsoft» ning navbatdagi yordamchisini qabul qilishga tayyormikin?» — deydi «Counterpoint Research» direktori o‘rinbosari Devid Naranxo «Al Jazeera» telekanaliga.

Biroq, yangi avlod agentlari ma’lumotlarni bulutli serverlarda emas, to‘g‘ridan-to‘g‘ri qurilmaning o‘zida qayta ishlashi sababli, bu safar maxfiylik bilan bog‘liq xavotirlar biroz boshqacharoq.

«Sun’iy intellekt muhitini yaratayotganda, uning qaysi ma’lumotlarga kira olishini qat’iy cheklab qo‘yish kerak. Unga hamma narsaga kirishga ruxsat berishda o‘ta ehtiyotkorlik talab etiladi. «Windows» esa go‘yoki: “Uni «Windows» muhitiga joylashtiramiz, u komputeringizdagi hamma narsaga kirsin va unga cheklanmagan huquq beramiz”, demoqda», — dedi «Grays Peak Capital» investitsiya firmasi asoschisi Skott Stivens.

U so‘zida davom etar ekan: «Odatda bunday yo‘l tutish maqsadga muvofiq emas. Shuning uchun ham faqat muayyan vazifalarni bajarishiga mo‘ljallangan alohida agentlar yoki modellar yaratiladi. Vaholanki, «Copilot» va «Windows» holatida undan foydalanish uchun hamma narsaga ruxsat berish talab qilindi. Odamlarga esa bu tobora yoqmayapti. Chunki buning uchun unga butun boshli operatsion tizimingizni va barcha dasturlaringizni topshirib qo‘yishingiz kerak».

Ushbu e’londan so‘ng Uoll-stritda «Nvidia» aksiyalari kunlik savdolarda 6 foizga qimmatladi. «Windows» aksiyalari 2,2 foizga, «Dell» esa 10 foizga o‘sdi. Ushbu yangilik fonida asosiy raqobatchilarning aksiyalari esa arzonlashdi: xususan, AMD aksiyalari 0,5 foizga, «Intel» ko‘rsatkichi esa 4,5 foizga pasaydi.