«OpenAI» ўзининг сунъий интеллектга асосланган «Atlas» браузерини ёпмоқда
Бундан бироз аввал компания қисқа видеолар яратувчи «Sora» сунъий интеллект генераторини ҳам ёпган эди.Бундан бироз аввал компания қисқа видеолар яратувчи «Sora» сунъий интеллект генераторини ҳам ёпган эди.
«OpenAI» компанияси сунъий интеллектга асосланган ўзининг «Atlas» браузерини қўллаб-қувватлашни тўхтатади. Бу ҳақда компания маълумотида хабар қилинди.
Лойиҳани ёпиш сабаблари ва браузернинг кейинги тақдири
«OpenAI» маҳсулотлар бўйича жамоаси вакили Жеймс Саннинг сўзларига кўра, «Atlas» камида 2026 йилнинг 9 августига қадар ишлаб туради. Унинг баъзи функциялари ChatGPT'нинг десктоп иловаси ва Google Chrome учун кенгайтмада тақдим этилади.
Шундай қилиб, мазкур браузер бозорда бир йилдан камроқ вақт мавжуд бўлди. Браузерни ёпиш қарори иловалар бўйича директор Фижи Симо жамоани иккинчи даражали лойиҳаларни қисқартиришга чақирганидан тўрт ой ўтиб қабул қилинди. Бундан бироз аввал компания қисқа видеолар яратувчи Sora сунъий интеллект генераторини ҳам ёпган эди.
ChatGPT Atlas браузери 2025 йилнинг 21 октябрида тақдим этилган бўлиб, ишлаб чиқувчилар одамларнинг интернетдан фойдаланиш усулларини қайта кўриб чиқишни мақсад қилган эди.
Аммо, Ғарб журналистларининг дастлабки шарҳларида Atlas ҳатто сунъий интеллекти йўқ бошқа браузерлардан ҳам ортда қолаётгани қайд этилган. Хусусан, у қидирув тизими сифатида ёмон ишлагани, тез-тез нотўғри жавоблар бергани ва асл манбаларга ҳаволаларни чеклагани таъкидланган.
