Ўзбекистон паспорти глобал индексда 123-ўринни олди
Кучли ўнталик қаторида Осиёдан фақат Сингапур паспорти яхши кўрсаткични қайд этди
© ru.pinterest.comЎзбекистон паспорти дунёда 123-ўринни эгаллади. Бу ҳақда янги Global Pasport Index (GPI) рейтингида қайд этилган.
Ушбу кўрсаткич 2026 йилги маълумотларни ўзида акс эттиради. Фақат визасиз ҳаракатланишни ҳисобга оладиган классик Henley Passport Index’дан фарқли ўлароқ, GPI учта асосий омилни баҳолайди: саёҳат қилиш имконияти, инвестиция жозибадорлиги ва ҳаёт сифати. Ана шу омиллар бўйича олиб қараганда ўзбек паспорти индекслар бўйича мобилликда 129, инвестицияларда 89 ва ҳаёт сифатида 119-ўринга лойиқ кўрилди.
Марказий Осиё мамлакатлари орасида Қозоғистон етакчи (107-ўрин), кейинги ўринларни Ўзбекистон (123-ўрин), Қирғизистон (127-ўрин), Тожикистон (140-ўрин) ва Туркманистон (144-ўрин) эгаллаган.
Паспорти кучли бўлган мамлакатлар орасида пешқадам Швеция бўлиб, у мобиллик индекси бўйича 11-ўрин, инвестициялар бўйича тўққизинчи ва ҳаёт сифати бўйича иккинчи ўринда жойлашган. Кейинги ўринлар Швейцария, Финландия, Германия, Дания, Нидерландия, Ирландия, Буюк Британия ва Норвегияга насиб қилган. Кучли ўнталикни Сингапур якунлаб берган.
Маълумот ўрнида айтиш керакки, Henley Passport Index’нинг 2025 йилги ҳисоботига кўра, Ўзбекистон фуқаролари 62 давлатга сафар қилиш имконига эга. Бу кўрсаткич 2024 йилда қайд этилган 80-ўринга нисбатан 6 поғона яхшиланганини англатади.
