Ўзбекистонда эркаклар сони аёллардан кўпроқ экани маълум қилинди
2026 йил бошида эркаклар сони бўйича энг юқори кўрсаткич Наманган вилоятида қайд этилган бўлса, Тошкент шаҳрида аёллар сони устунлиги кузатилган.
Миллий статистика қўмитаси маълумотларига кўра, 2026 йил 1 январ ҳолатида Ўзбекистонда гендер нисбати эркаклар фойдасига шаклланган. Мамлакат бўйича ҳар минг нафар аёлга ўртача 1 015 нафар эркак тўғри келган.
Ҳудудлар кесимидаги кўрсаткич
Ҳудудлар кесимида энг юқори кўрсаткич Наманган вилоятида қайд этилган. Вилоятда ҳар минг нафар аёл ҳисобига 1 034 нафар эркак тўғри келади. Қашқадарё вилоятида бу кўрсаткич 1 029 нафарни, Андижонда 1 027 нафарни, Навоийда 1 026 нафарни ташкил этган.
Шунингдек, Сурхондарё вилоятида ҳар 1 минг нафар аёлга 1 025 нафар эркак тўғри келган. Жиззах ва Фарғона вилоятларида бу кўрсаткич 1 019 нафардан бўлган. Самарқанд вилоятида эса ҳар 1 минг нафар аёл ҳисобига 1 016 нафар эркак қайд этилган.
Қорақалпоғистон Республикасида мазкур нисбат 1 010 нафарни ташкил қилган. Сирдарё вилоятида 1 009 нафар, Тошкент вилоятида 1 008 нафар, Бухоро вилоятида 1 006 нафар ва Хоразм вилоятида 1 004 нафар эркак қайд этилган.
Пойтахт Тошкент шаҳрида эса аксинча ҳолат кузатилган. Статистикага кўра, шаҳарда ҳар 1 минг нафар аёлга 966 нафар эркак тўғри келган. Бу аёллар сони эркакларга нисбатан юқорилигини англатади.
Шу билан бирга, 2026 йил 7 апрел ҳолатига кўра, Ўзбекистоннинг доимий аҳолиси 38 миллион 401 минг 654 нафарга етган. Умумий ҳисобда эркаклар сони аёлларга нисбатан 276,4 минг нафарга кўп экани қайд этилмоқда.
